Sukli sa utang

Gula 236

Labaw pas naka-bingo ang akong feeling sa dihang nagkadungan kami si Mar pagsangko sa kinapungkayan sa himaya. Natingob ang kahinam nga akong gibati ug kini milubad ngadto sa usa ka langitnong sensasyon nga dili ikatandi sa bisan unsang butang sa kalibotan.

Human makapabuto si Mar mipatighulog sa akong kiliran.

“Gusto ka’g alak?” Gipangutana ko siya dihang inanay nang milurang ang gibati kong kakutas.

“Ngano man?” Gisukit ko niya. “Gusto kang mahubog ko?”

“Dili. Gusto kong mosamot ang kondisyon sa imong lawas.”

“Okey, kun maoy imong gusto.”

Mihinay ko’g bangon ug migawas sa lawak. Kay adjacent ra man sa balay ang tindahan, dili na kinahanglang mogawas pa ko sa front door kun mosulod ko niini. Misulod ko sa tindahan ug mikuhag GSM Blue. Paggawas nako sa tindahan, milahos ko sa nahimutangan sa ref ug nagkuhag ice. Unya mibalik na ko sa kuwarto diin nagpaabot si Mar nako.

Gipahimutang nako ang ilimnong makahubog sa ibabaw sa lamesa ingon man ang ice ug baso.

“Dali na,” giagda ko si Mar nga nagpabiling naghayang sa kama. Mibangon siya agi’g sanong sa akong pag-agda ug miduol sa akong nahimutangan. Miagbay siya nako samtang giipisan nako ang baso nga bag-o lang gibutangan og ice. Wala nako pun-a og maayo sa alak ang baso.

 Gidawat dayon ni Mar ang baso nga gisudlan sa alak dihang gitunol ko na kini kaniya. Igong nadutlan sa kabugnaw ang alak tungod sa ice nga gibutang, giyarok kini ni Mar gikan sa baso. Giipisan nako pag-usab ang baso human kadugangi og ice.

 “Mga alas onse imedya mopauli na ko,” nagkanayon si Mar. “Dili maayong mabuntagan ko dinhi.”

“Husto ang imong plano,” giingnan ko siya. “Maglikay lang gyud ta sa bulilyaso.”

Giyarok na usab ni Mar ang bino nga sulod sa baso. Pagkahuman, gibutang niya ang baso sa ibabaw sa lamesa. Gipunit nako ang botelya sa bino aron tiingan kini pag-usab. Pero kalit lang kong gigakos ni Mar ug unya gibaswat paingon sa kama.-- Sumpayan pa