Kilometro 35

Gula 71

Ingon sa nag-anam nag katin-aw alang nako ang mga panghitabo. Sa akong pag-analisar, mora’g nagsulti gyud si Keith sa tinuod.

“Maayo kay wala ka patya nila ni Sheldon,” giingnan ko si Keith.

“Patyon gyud unta ko niya kun wala pa siya pugngi ni Karl,” nagkanayon si Keith. “Maayo gani kay nakombinser niya si Sheldon nga mameligro sila kun ila kong patyon kay may nakakita ra ba nila sa ilang pagkuha nako didto sa balay. Maong ila lang kong gibun-og.”

“Nganong wala ka man mahikuyog nila kagahapon didto sa usa ka beach resort sa Mattan City?”

“Midistansiya nako nila, Sandra, kay di na nako maantos ang ilang binuhatan. Misamot ang kadaotan ni Sheldon.”

Inanay kong mibatig kaluoy kang Keith samtang naghunahuna nga lakip siya nakatilaw usab sa kabangis ni Sheldon.

Apan wala nako tugoti nga mopatigbabaw ang kaluoy sa akong kaisipan. Mao gyu’y mipatigbabaw sa akong galamhan ang kasilag sa mga tawo nga milugos kanako. Ug bisan nanghunaw na si Keith nga wala siya moapil paglugos nako apan apil gihapon siya sa akong panimalos ngalan nga usa siya sa mga barkada ni Sheldon nga maoy labaw kong gikasilagan.

Kalit kong gilanit ang armas gikan sa hawakan ni Bredhart nga nagbarog sa akong tupad ug gition ko kini ngadto kang Keith.

“Ayaw pagtuo nga luwas ka na human sa tanan nga imong giasoy kanako,” giingnan ko si Keith. “Apil ka gihapon sa akong panimalos.”

“Sige,” ni Keith pa. “Ipadayon ang gusto mong buhaton. I welcome it, Sandra. Taposa na ang akong kinabuhi aron makapahuway na ko sa tulisok sa akong tanlag! Sige na, Sandra!

Ambot kun nganong kalit man lang nausab ang akong hunahuna. Inanay kong gipaubos ang gigunitan kong armas! -- Sumpayan pa