Kilometro 35

Si Keith miasoy nga dihang nakuyapan ko human iparok ni Ervin sa salog nga semento ang akong ulo, gipadayon gayod diay sa salbahis ang paglugos nako bisan wala na ko’y panimuot. Pagkahuman ni Ervin, siya na usab si Keith ang ilang giapura sa pagpahimulos sa akong lawas.

“Apan nagdumili ko pagsanong sa ilang awhag,” nagkanayon si Keith. “Nagdumili ko kay gawas nga nahadlok kong patay ka na tungod sa daghang dugo nga migawas gikan sa samad sa imong ulo, naluoy sab ko nimo.”

“Wa na koy kasayoran sa misunod nga panghitabo human ko kawad-i sa panimuot,” giingnan ko si Keith. “Unsaon nako pagtuo nga wala ka moapil sa pag-among-among nako?”

“Di ko ikaw pugson sa pagtuo, Sandra. Ang ikasulti ko lang mao nga dili ko sama kahangol og unod nila ni Sheldon.”

“Kun tinuod pa nga naluoy ka nako, nganong wa ka man mohimo’g lakang aron pagluwas nako? Aron dili molampos sila si Sheldon sa paglugos nako?”

“Nasayod kong wa koy mahimo, Sandra, kun mopakita ko’g pagsukol nila aron pagpanalipod nimo. Nakaseguro ko nga kun suklan ko sila, ang nahitabo sa imong boyfriend nga si Orville mahitabo sab nako.”

Nakahinuktok ko sa gisulti ni Keith. Mora’g inanay kong nakombinser nga tinuod ang iyang gipanulti. Nga wala siya mamakak!

“Giunsa man pagkasayod nila ni Sheldon nga buhi pa ko?” Gipangutana ko na sab si Keith.

“Kagahapon ilang nakaplagan si Lyle sa hilit nga bahin sa usa ka beach resort nga nagtinga na,” ni Keith pa. “Sa wala pa kabugtoi sa gininhawa si Lyle, nakatug-an siya ngadto kanila ni Sheldon nga buhi ka ug ikaw ang nagpatay kaniya.”

“U-unsa?”

“Mao kana, Sandra. Ug tungod sa maong hitabo, akoy ilang gibasol. Nasuko pag-ayo si Sheldon nako.” -- Sumpayan pa