Sukli sa utang

Gula 230

Alang nako, dili gihapon angay nga pakatawhon ang bata nga akong gisabak. Wala ko makaseguro kun kinsa ang amahan sa maong bata. Dako ang posibilidad nga kang Ferdinand ang maong bata. Pero posible sab nga si Lorte maoy amahan niini kay nagsige man sab mi’g sawsaw.

Ang akong gikabalak-an kun simbako dili moliwat ni Ferdinand ang bata kun ihimugso ko gyud kini. Unsaon na man lang kun adto kini moliwat ni Lorte? Mabulgar na gyud hinuon ang milagro nga akong gihimo! Mao nga aron paglikay sa kontrobersiya, gi-abort gyud nako ang bata o kinabuhi nga gipuyos sa akong sabakan.

Nadugangan na sab ang akong sala sa mga mata sa Dios ug sa tawo. Apan mipatigbabaw gyud ang akong ka-selfish ug ang paglikay sa posibleng problema nga dili ko buot nga mahiagoman maong akong gipangunayan paglaglag ang inosenteng kinabuhi sa akong sabakan.

Nanglabay ang mga adlaw. Nagpadayon mi si Lorte sa salawayon ug makauulaw namong relasyon. Mora’g dili na mabangbang ang among pagdula sa kalayo sa pagpakasala. Ingon sa hingpit nang miulipon sa among mga galamhan ang kahangol sa unodnong himaya.

Miabot ang bulan sa Mayo. Mipauli si Ferdinand sa Tambo kay nagsingabot na man ang pista sa among dapit. Temporaryong nahunong ang kinawatkawat nga kalipay namo ni Lorte. Si Ferdinand una ang nagpakatagbaw pagdimdim sa kalalim sa akong pagka babaye.

Human sa pista sa Tambo, mibalik na si Ferdinand sa Manila. Nahibalik ang malipayong mga adlaw namo ni Lorte. Hapit kada gabii nga mosulod siya sa balay aron didto sa akong lawak walay pagkapuol namong tagayon ang matam-is nga dugos sa lawasnong kalipay.

“Morag duna na ra bay nakamatikod sa atong relasyon,” nagkanayon si Lorte usa ka gabii niana human sa among panaghilawas.”

“Kinsa man?” Gipangutana ko siya.

“Ang akong maguwang, si Noy Godo. Nakapaniid kuno siya sa akong mga lihok. Wa hinuon ko moangkon pero iya gyud kong gipasidan-an nga mohunong na sa gihimo kong binuang aron paglikay sa eskandalo.”

“Kun mao kana, kinahanglang doblehon ta ang atong pag-amping.”

Naghinapos na kadto ang bulan sa Mayo sa dihang naigo sa cardiac arrest ang amahan ni Lorte ug namatay kini. Gumikan sa maong hitabo, wala na makapadayon si Lorte pagtungha sa kolehiyo. -- Sumpayan pa