Kilometro 35

Gula 67

Gipadul-an pa gyud nako ang lamesa nga gihigdaan ni Keith nga wala pay panimuot. Misunod si Fernan kanako.

“Nakaila ka ba kaniya, Sandra?” Gipangutana ko ni Fernan.

“Oo,” laktod kong tubag.“Siya si Keith Agcaoili, ang sunod nakong patyonon.”

“U-unsa?”

“Ingon sa mibulig gyud kanako ang higayon aron mapatay ko siya sa dakong kasayon.”

Wala motubay si Fernan sa akong gisulti. Milingi siya sa among luyo diin nagtindog sila si Bredhart ug mga kauban sa igong gilay-on. Gisenyasan ni Fernan si Bredhart ug miduol kini kanamo.

“Nganong gidala man ninyo kining tawhana dinhi?” Gipangutana ni Fernan si Bredhart. “Ug nganong nabun-og man siya pag-ayo?”

“Nabangalan ra na siya namo, Boss,” tubag ni Bredhart.

“Unsay buot mong ipasabot?” Nagpakitubod si Fernan.

Si Bredhart miasoy nga sa ilang pagpauli human matuman ang ilang misyon didto sa kinapusoran sa siyudad, nasundan nila ang sakyanan ni Sheldon Abrigos nga misubay sa karsada paingon sa bukirang bahin sa siyudad. Gisundan lang nila kini sa igong gilay-on.

Pag-abot sa usa ka hilit nga dapit, mihunong ang gisakyan nila ni Sheldon. Gipahunong usab nila ni Bredhart ang ilang gisakyan aron maniid. Nakita nila nga may gihulog sila si Sheldon ug Karl ngadto sa kimba nga dili kaayo layo sa karsada. Pagkahuman, namiya sila sa maong dapit.

“Dihang nakabiya na sila si Sheldon,” ni Bredhart pa. “Among gisusi kun unsay ilang gihulog sa kimba. Tawo diay. Ug nakahukom kong dad-on siya dinhi dihang akong nasuta nga siya si Keith Agcaoili.”

“Di ba barkada man ni Sheldon Abrigos kining tawhana?” Ni Fernan.

“Oo, Boss,” ni Bredhart. “Nagduda kong nakasala kang Sheldon kining tawhana maong gibun-og siya nila.” -- Sumpayan pa