Kilometro 35

Gula 66

Wala pa gani mohupas ang after glow nga akong nasinati human sa mainitong panaghilawas namo ni Fernan, may sakyanan nga mihunong sa tungod sa balay. Miaringkil ang puthaw nga gate ug misulod ang sakyanan sa tugkaran. Unya gipalong ang makina sa sakyanan.

“Sila na si Bredhart ang nahiabot,” nagkanayon sa Fernan dayong timbakuwas og bangon ug nagdali pag-ilis.

Mibangon sab ko ug nag-ilis. Pagkahuman, nagdungan mi si Fernan paggawas sa lawak. Migawas mi sa balay aron pagsugat nila ni Bredhart.

“Kumosta ang inyong lakaw, Bredhart?” Gipangutana dayon ni Fernan ang sinaligan niyang sakop.

“Milampos mi, Boss,” taho ni Bredhart. “Seguradong ang nahitabo sa bigtime druglord nga among gitipi maoy mag-unang balita sa TV unyang hapon ug mao say headline sa mga pamantalaan ugma.”

“Kasaligan ka gyod, Bredhart,” ni Fernan pa.

“Salamat, Boss,” tubag ni Bredhart. “Ug tuod diay, may dala mi sa among pagpauli dinhi. Amo kining gipahimutang sa underground ning balay.”

“Unsa ba diay ang inyong gidala, ha?” sukit ni Fernan.

“Tan-awa lang ninyo, Boss,” matud ni Bredhart. “Nakasiguro kong ikalipay ni Sandra ang among gidala.”

Aron masayran kun unsay gidala nila ni Bredhart sa ilang pagpauli gikan sa siyudad, miadto dayon mi sa underground. Nag-una si Fernan. Nagsunod ko niya. Nagsunod sab namo sila si Bredhart ug mga kauban.

Pagsulod namo sa underground, dihadiha misugat sa akong panan-aw ang tawo nga wala maglihok nga naghigda sa usa ka lamesa. Morag wala pa siya’y panimuot. Nagkadugo ang iyang nawong. Daghan siya’g mga bun-og. Ug nakugang ko dihang ako nang nailhan ang maong lalaki. Siya si Keith Agcaoili! (Sumpayan pa)