Buhi nahigugma sa kalag

Aniay usa ka talagsaon ug makapalimbawot sa balhibo nga sugilanon sa gugma sa usa ka buhi kinsa nahigugma ngadto sa usa ka kalag angay imantala alang sa kasaulogan sa Valentine's Day. Haom kaayo niining pagsaulog sa adlaw sa nanaghigugmaay.

Usa kini ka kasinatian sa usa ka babaye nga si Penns Greene nga iyang giasoy ngadto sa usa ka magazine sa Australia. Kini iyang kaagi nahitabo dihang miuban siya sa usa ka grupo sa mga turista nga miduaw sa usa ka "museum" sa karaang guba na nga Bavarian fortrees sa Wolfeeg sa Danube River.

Ang maong katingalahang kuta nga natukod kaniadtong 1028, giingon nga gipuy-an sa mga kalag.

Sumala pa ni Greene, samtang nanuroy sila sa kuta, gisuginlan siya sa ilang guide sa nahitabo didto sa maong dapit diin usa ka babaye ang gipugos sa iyang mga ginikanan sa pagminyo ngadto sa usa ka adunahang tawo.

Ang babaye bisan pa sa iyang pagsupak sa mando sa iyang mga ginikanan napugos gayod pagtuman sa ilang gusto. Ug tungod sa tumang gugma sa babaye ngadto sa iyang hinigugma, sa hilum gipadayon nila ang tinago-tago nilang kalipay.

Ang kinawat-kawat nga pagtagay sa kalipay sa duruha ka mga batan-ong naghigugmaay, sa kadugayan kay wala may aso nga makumkom, nasakpan ra gayod sila sa tigulang nga bana sa babaye. Gipatay gayod sa tigulang ang duruha ka mga batan-on. Ug sa kaligutgut sa ginikanan sa babaye, ila usab gipatay ang tigulang bana sa ilang anak. Gikan kaniadto ang kuta giingon gipuy-an na sa mga kalag.

Ug matud pa ni Greene, siya nahimulag sa ilang grupo ug dihang gikapuyan na siya sa pagpangita sa iyang mga kaubanan. Mao na lay iyang nabatian ang bugnaw nga kamot migunit sa iyang bukton. Unya nabati niya ang halawom nga limbatianong tingog nag-ingon: "Nakita ko na gayod ikaw, akong mahal. Gaksa ako, gimingaw ako kanimo."

Matud ni Greene wala gayod siya batia og kahadlok ug miingon nga wala usab siya makasabot sa sinultihan sa misteryosong lalake. Apan nasabtan niya ang gipamulong niini.

Paglingi pa niya, iyang nakita ang usa ka ambungang lalake kansang mga mata basa sa luha ug masulob-ong nagsud-ong kaniya.

Matud ni Greene wala tuyoa gibati dayon niya ang talagsaong pagbati ug kaluoy niadtong katingalahang lalake. Wala siya makasabot sa iyang gibati niadtong tungora sa ilang kalit nga panagkita.

Apan naputol ang wala damha nilang panagkita sa lalake kay miabot ang iyang mga kaubanan nga nahimulag kaniya. Kalit lang usab nawagtang ang katingalahang lalake sama sa aso. Iya kining gihagoan sa pagpangita apan wala na gayod kini niya makita.

Si Greene misulti ngadto sa iyang mga kauban ang katingalahang gibati niyang gugma ug kaluoy sa maong lalake. Ug miingon nga dili ug dili gayod niya makalimtan kadtong kalit nilang panagkita didto sa kuta. Ug nga dili na gayod siya mangita pa og lain nga lalake nga higugmaon. Gawas niadtong misteryosong lalake.

Kining talagsaong pagbati ni Penns Greene maoy usa ka pagbati ug paghigugma sa usa ka buhi ngadto sa usa ka kalag nga kalit miturok didto sa wala damhang panagkita didto sa Wolfeeg Fort sa Bavarian kinsa giingon nga gipuy-an sa mga kalag. (Kataposan)