Kilometro 35

Gula 63

Human sa duha ka hugna nga pagpinarayganay nga tugob sa kamainiton, migawas na ko sa lawak ni Fernan. Mibalik na ko sa akong lawak. Lawom ug mingaw na kaayo ang kagabhion. Wala na gyu’y timik ang palibot.

Pagsulod nako sa akong lawak, mihigda dayon ko. Gusto na kong matulog. Pero wala dayon ko makatulog. Nahinumdom ko kang Orville, ang akong boyfriend nga gipatay nila ni Sheldon ug mga barkada.

Hapit na matapos ang akong pagpanimalos, Orville! Kun mahingpit na unya ang akong panimalos, puyde na sab kong mamatay aron magkita na kita sa laing kalibotan! Milanog kining maong mga pulong sa lawak sa akong kaisipan. Ug wala ko kapugngi ang pag-agas sa akong mga luha samtang namalandong ko sa kasakit sa gidangatan sa gugma namo ni Orville.

Pagkaugma, human gyud sa pamahaw, nanglakaw sila si Bredhart ug mga kauban. Matud pa ni Fernan, ang lider sa mga vigilante, may gisangon siyang misyon ngadto nila ni Bredhart.

“Mo-sample mi’g bigtime nga druglord,” ni Fernan pa. “Aron pagkorehir sa impresyon sa katawhan ug sa media nga ang mga small fish ray kaya namong tumbahon. Among pamatud-an nga makahimo sab mi pagpatay og iho.”

Kay kami ra man ang nahibilin sa balay, amo ang tanang higayon sa pagtagbaw sa among kauglaingon diha sa pagtagay sa lawasnong kalipay.

Dili mapahimuslanon sa higayon si Fernan. Nakita ko nga dako siya’g respeto sa akong pagka babaye. Kun dili pa tungod sa pag-seduce nako kaniya, wala gyu’y mahitabong seksuwal nga panagbagat tali namong duha.

Gusto lang kong malipay maong kanunay nakong tentalon si Fernan. Ug gusto ko usab siyang pahalipayan pinaagi sa pagtahan kaniya sa akong lawas tungod kay dako na gyud siya’g natabang nako. Kun dili pa tungod kaniya, hayan dili pa gyud matigayon ang gipanganti kong panimalos ngadto sa mga tawo nga nag-gang rape nako! -- Sumpayan pa