Si Senyor ug Junior sa Valentine's Day

Ning kasaulogan sa Valentine's Day, linga kaayo ang amahan ug anak sa pag-ispoting, nga nagpulipuli og sud-ong sa ilang kaugalingon sa dakong salamin atubangan sa hawanan. Nagkihatkihat si Mar Senyor nga mipasiplat kang Mar Junior. Parehas gyud silang dangas og agtang kay upawon ang ilang pamayhon.

"Pa, yatis, nagkadungan gyud ta’g ispoting ning buntaga!" nagtingsi si Mar Junior nga nagpanglingo. Mihunghong si Mar Senyor sa carbon copy nga anak.

"Shh, may tambungan kong miting sa mga magsusulat. Tayming nga nakakubra ko’s akong pamintal gahapon ug nakubra sab nako ang agi ko sa Banat News gahapon! May alawans gyud ang bulsa...!"

"Asa ka miting...!" nagpanglingo si Mar Junior nga mibawos og hunghong sa turkohon nga amahan. "Wayis gyud ka, Pa, ha! Sayod kos tirada mo rong adlawa! Aw, di man ko mosumbong ni Mama Maylit ba! Sus, Valentine's Day ra ba ron...!"

Nagyangoyango si Mar Senyor nga mibalik og hunghong sa liwat nga anak.

"Ay, sus, sayod sab ko sa bisyo mo, Jun! Liwat gyud ka nako! Sayod sab ko nga nakakubra na kas sweldo mo sa city hall gahapon ug sa agi mo sa Banat News. Aw, di man sab ko magsaba sa kasiaw mos mga babaye sa imong asawa...!" ni Mar Senyor nga nagpasirit og perfume sa gisul-ob nga polo-shirt.

Gipasiklapan niya ang iyang asawang si Maylit nga linga sa pagluto didto sa kusina, alang sa ilang pamahaw.

Inila nga pintor ug writer si Mar Senyor sa Barangay Bahak, panginabuhian nga naghatag og kaharuhay sa iyang pamilya. Sa unom ka mga anak, si Junior maoy naliwat niya nga writer ug siaw sab sa mga babaye, bisan kun may asawa na ug mga anak. Gawas sa pagka-writer, empleyado sab sa city hall sa Opon si Junior, kansang asawa ug mga anak atua manimuyo sa ilang balay sa Negros, haduol sa balay sa mga ginikanan sa iyang asawa. Pagaduawon lang ni Junior ang iyang pamilya sa Negros matag bulan.

Si Mar Senyor, bisan kapin na sa 60 ang edad, kusog gihapon nga mosiyapol og tsiks. Nahimo niyang suki sa Junquera ang batan-on ug seksing babaye nga si Esmie. Ug mao kini karon ang iyang tumong ug tuyo sa pag-ispoting niya atol ning Adlaw Sa Guma.

Human makapakondisyon og usa ka lapad sa Tanduay Five Years sa suking imnanan sa Junquera, gipasiklapan dayon ni Mar Senyor ang iyang relo-de-pulso. Lapas na sa alas dose sa udto. Sakto gyud nga manghingudto siya sa gikamingawan ug gikahidlawan niyang si Esmie. Miyuho dayon siya sa pag-adto sa balay sa suking bugaw nga si Dodong nga parehas sab niya nga upaw ug dangas ang agtang. Ang balay sa maong bugaw adunay kuwarto nga tsik-inanan, aron dili na lang moadto pa sa usa ka hotel.

"Uy, Bosing Mar, Suki! Bida, aduna may nakauna nimo kang Esmie, naa pas kuwarto...!" tug-an sa upaw nga bugaw.

"Mao ba? Aw, hulat lang ko! Si Esmie man gud ang kinaham ko!" ni Mar Senyor nga milingkod sa sopa. Unya, natukas ang pultahan sa kuwarto. Migawas si Esmie nga giagbayan sa usa ka lalaki. Nahatindog si Mar Senyor nga nahatutok sa nag-agbay sa suki niyang babaye.

"J-Junior...!"

"Papa...!"

Nahatukiki og katawa si Esmie. "Senyor ug Junior diay mo? O, sige. Ning Adlaw Sa Gugma, out Junior ... in Senyor...!"

Ug nagkatinutokay ang amahan ug anak. (Kataposan)