Misinggit nalang og 'sayang!'

Ang imo rang matahom nga panagway mao ra ang kanunay kong mahanduraw, Sister Rebecca. Kanunay akong mohilak sa matag higayon nga dili ikaw ikauban sa atong senimanang fellow-ship, matud pa ni Rolando nga wala na gayod makapugong sa iyang gibati nga dakong gugma ngadto ni Rebecca.

"Nakasabot ako sa dakong gugma nga imong gibati ngari kanako, Rolando. Apan, ayaw kalimot nga minyo ka ug may upat ka buok anak. Ang ako nga tuyo ug tumong nga aktibo ako sa atong relihiyosong kalihokan mao ra gayod ang paghimaya sa atong Diyos, ug kang Mama Mary."

"Busa, please patya kanang imong yawan-ong pagbati ngari kanako, Rolando. Kun dili ka gusto nga akong bugtoon ang talikala sa atong panaghigalaay," prangka nga sulti ni Rebecca.

Si Rolando ug Rebecca aktibo nga mga debotos ni Santa Maria. Si Rolando maoy lead guitarist. Samtang si Rebecca maoy lead singer. Mga tulo ka tuig sila nga nagkasuod pag-ayo hangtod nga niabot ang panahon si Rolando nakat-on sa paghigugma ngadto kang Rebecca. Kana tungod sa dalaygong mga kinaiya ug hiyas nga gihuptan sa dalaga. Si Rebecca nga gihulagway ni Rolando nga guwapa hilabihan ka thoughtful, loving ug caring. Ang dalaga nahimo na niyang sumbongan sa iyang mga suliran sulod sa mokapin sa duha ka tuig. Maayo siya nga motambag kay usa kini ka psychologist ug migradwar sa iyang kurso isip summa cum laude sa University of the Philippines.

Nahulog ang iyang pagbati ni Rebecca kay aduna kini daghang mga hiyas nga iyang gipangita sa usa ka babaye apan wa niya makaplagi ngadto sa iyang asawa. Ang iyang asawa selosa, dominante ug kontrabida sa iyang kinabuhi. Duna unta siyay laraw sa pakigbulag kaniya sa diha nga uyab pa sila. Apan, wala mahinayon ang iyang plano sa pagkahibalo niya nga nagsabak na kini sa kamagulangan nilang anak.

Samtang ang iyang gugma ni Rebecca nagkadako. Ang iya usab nga pagbati ni Patricia nagkabugnaw. Usa niana ka adlaw nakapamalandong si Rolando nga niabot na gayod unta kuno ang iyang "dream girl". Apan, ang maong babaye dili mahimo nga iyang angkonon kay aduna na man siyay kabilinggan sa kinabuhi. Igo lang siyang nanaguto ug milingolingo diha sa lantay nga kawayan nga iyang gilingkoran. Unya nikalit siya sa pagbarog ug hinurot ang tanan niyang tingog nga misinggit sa pulong, "Sayang". (Kataposan)