Sukli sa utang

Morag naghunahuna sa makadiyot si Lorte aron matubag niya ang akong pangutana nga nagpahunat sa iyang desisyon.

"Paninguhaon nako," maoy iyang tubag.

"Seguroa," giingnan ko siya. "Magpaabot ko nimo sa panihapon. Magdungan gihapon tag kaon."

"Okey, kun maoy imong gusto."

"Good...!"

Migawas na siya sa pultahan sa kusina. Nagpanglingi siya samtang midali sa pagpalayo. Ngitngit pa hinuon ang palibot. Mingaw ug tugnaw pa ang kaadlawon bisan nagpakita na'g pamasibas ang kabuntagon.

Giserad-an ko ang pultahan sa kusina dihang wala ko na makita si Lorte. Mibiya dayon ko sa kusina. Milahos ko sa akong lawak. May oras pa aron makatiwas ko'g katulog sa dili pa mohingkod ang kabuntagon.

Nakatulog gyod ko'g balik. Sa akong pagmata, hapit na ang alas siyete sa buntag. Naghikay ko'g pamahaw sa kusina. Tungod ba kaha kay natambalan na gyod ang akong kahidlaw sa lawasnong panginahanglan, madasigon kaayo kong miatubang sa mga buluhaton niadtong buntaga. Nagkantakanta pa ko sa awit nga nag-ulohan og "I'll Never Get Enough" nga gipasikat sa Air Supply kaniadto.

Nianang pagkahapon, sayo kong naghikay sa panihapon. Gibati ko ang kahinam nga naghunahuna nga moabot na si Lorte unyang taudtaod segon sa among gikasabotan. Gibati ko nga mora ko'g bag-ong nadalag a nga naghinamhinam sa pag-abot sa suitor nga bisita. Nag-ihi-ihi ko matag karon ug unya, kaha tungod sa kahinam nga mihakop kanako.

Human makaluto sa panihapon, miadto ko sa sala aron motan-aw og salida sa telebisyon. Pero wala koy nagustohan sa mga salida sa lainlaing channel sa telebisyon maong gipalong ko na lang kini. Sa gawas, akong namatikdan nga mitikyop na gyod ang kangitngit.

Wala pa mahiabot si Lorte. Tingali nangita pa siya'g tukmang tayming pagsulod sa balay. Wala hinuon ko mabalaka nga iya kong indiyanon. Naserto na'g maayo ang among sabot kaganina.

Misantop sa akong hunahuna nga andamon ko na lang daan ang lamesa aron inig-abot ni Lorte, manihapon na mi dayon. Dihadiha miadto ko sa kusina. Samtang nagpahimutang ko sa mga pagkaon sa lamesa, dihay nanuktok sa pultahan sa kusina. (Sumpayan pa)