Kilometro 35

Pagkasunod adlaw, gipadayon namo ang pagpahigayon og operation batok kang Lyle Cubillo. Gusto na ni Fernan, ang lider sa mga vigilante, nga matigayon na ang akong pagpanimalos kang Lyle.

Gikan sa pinuy-anan sa mga Cubillo, gisundan nila ni Bredhart ug mga kauban si Lyle nga mibiya sa balay. Kun sila pa lang ang molikidar kang Lyle, hayan natipi na nila kini.

Pero dili ko mosugot nga laing tawo ang mohunos sa kinabuhi ni Lyle. Gusto ko nga ako gyod ang mangunay sa pagpatay niya. Mao nga gisunodsunoran lang nila ni Bredhart si Lyle kun asa kini mopaingon. Hangtod nga nahiabot sila sa pagsunod niini sa usa ka beach resort sa barangay Hagna, Mattan City. Midiretso na lang mi si Fernan sa maong dapit.

Pag-abot namo sa beach resort, gisugat dayon mi ni Bredhart.

"Naa si Lyle Cubillo sulod sa beach resort, Boss," si Fernan ang gipakigsultihan ni Bredhart. "Kauban na niya sila si Karl Padon ug Sheldon Abrigos nga nag-una na niya dinhi."

"Si Keith Agcaoili diay?" Gipangutana ko si Bredhart.

"Wa namo siya makita," tubag ni Bredhart.

"Pangandam lang gyod mo kanunay," nagkanayon si Fernan ngadto kang Bredhart. "Kinahanglang makaabag dayon mo kang Sandra kun makakita na unya tag tukmang tayming."

"Areglado, Boss," matud ni Bredhart dayong biya sa among nahimutangan ug mibalik sa gipundohan sa iyang mga kauban.

Naghulat mi sa tukmang panahon sa pag-atake. Gipanid-an lang namo ang grupo ni Sheldon nga naghudyaka sa usa ka cottage. Sulod sa naghunong nga awto nga among giluwanan, nangandam kong daan sa akong kaugalingon. Gisul-ob ko nang daan ang akong takoban.

Wala madugay, nakita ko si Lyle nga mobiya sa cottage. Kalit lang kong gikulbaan samtang nagtan-aw niya nga naglakaw. (Sumpayan pa)