Sukli sa utang

Gula 217

Kaganina ra kong nagpamatyag sa mga lihok ni Lorte. Taudtaod na siyang nakasulod sa lawak nga akong gipahigdaan kaniya. Gipalong na ang suga sa maong kuwarto. Nagtuo kong nakatulog na gyud siya kay nagmingaw na man ang maong lawak. Nindot man gud kaayong ikatulog labina nga kusog kaayo ang pagbunok sa ulan.

Apan ako naghiwasa sulod sa akong lawak. Nag-alindasay ko sa ibabaw sa kama. Bisan unsaon nako’g piyong ang akong mga mata apan dili gyud ko makatulog. May kahasol nga mikuligaw sa akong hunahuna. Si Lorte. Oo, si Lorte ang nagdula-dula sa akong kaisipan.

Ang kabugnaw sa kagabhion nga gikaluhaan sa kusog nga bunok sa ulan nakapasamot sa kahidlaw nga akong gibati sa lawasnong panginahanglan. Ingon sa nanginit ang tibuok kong kalawasan. Ug ang awhag sa kahinam daw nagtukmod kanako pagpangitag tambal sa akong kahidlaw.

Dihang daw dili na gyud nako kapugngan ang awhag sa kahidlaw, mibangon ko og hinay nga migawas sa lawak. Miadto ko sa banyo. Gibasa ko sa tubig ang tibuok kong lawas. Namasin ko nga ang kabugnaw sa tubig makapalong sa nagdilaab nga kainit sa akong lawas nga nangandoy sa pagmahal sa usa ka lalaki.

Migawas ko sa banyo human makapanarapo sa tualya. Ingon sa milurang og diyotay ang bunok sa ulan didto sa gawas. Nabatyagan ko usab nga ingon sa mitaniag ang nagdangarang nga kainit sa akong lawas. Pero kadiyot ra kaayo ang pagpamugnaw sa akong pagbati. Kay pagkilab sa pipila ka gutlo, ingon sa mipatigbabaw na usab ang kainit sa akong lawas nunot sa subling pagkusog sa bunok sa ulan.

 Dihang daw dili na gyud ko makaantos, migawas ko’g balik sa akong lawak. Mipaingon ko sa pultahan sa lawak nga gikatulgan ni Lorte. Bahala na! Gisinggit kini sa akong hunahuna. Kinahanglang matambalan ang akong kahidlaw sa lawasnong panginahanglan aron mahunong na ang pagsalimuang sa akong hunahuna.

Gihinay nako’g liso ang seradora sa pultahan sa lawak nga gikatulgan ni Lorte. Akong nasuta nga wala diay kini ma-lock. Gitukmod nako’g hikay ang palid sa pultahan. Sa dihang naabli na ang pultahan, misulod dayon ko. Nagkinto ang akong mga lakang nga nagpaingon sa kama nga gihigdaan ni Lorte. Napugwat siya dihang mihigda ko sa iyang tupad. Unya mitimbakuwas siya pagbangon. -- Sumpayan pa