Sukli sa utang

Gula 214

Sukad nga nagkasulti kami si Ferdinand pinaagi sa long distance call niadtong miaging adlaw, gibati ko na hinuon ang kamingaw kaniya. Pero bentaha na lang unta kadto kay madala ra’g naya-naya.

Apan misamot ang akong kamingaw sa akong bana gumikan sa gisulti ni Lorte kaganina samtang nagsakay mi’g bus gikan sa Tagbilaran paingon sa Mabini. Miingon si Lorte nga mabalak-on nga pagkatawo si Ferdinand. Nakaingon ko sa hilom nga tinuod ang gisulti ni Lorte.

Sa kaugalingon kong kasinatian, dili lang kay mabalak-on si Ferdinand. Loving and caring siya. Usa ka lalaking responsable, buotan ug masinaboton. Suwerte ko nga nakabana niya.

Samtang naghunahuna sa mga hiyas nga nabatonan ni Ferdinand, misamot na hinuon ang gibati kong kamingaw ngadto kaniya. Hangtod nga ang kamingaw milubad ngadto sa kahidlaw. Oo, kahidlaw nga si Ferdinand ray makatambal. Aw, mahimo man hinuon kining tambalan sa laing lalaki, apan makasala na sab ko sa kaminyoon namo ni Ferdinand.

Gihidlaw ko sa lawasnong kalipay sukad sa pagbalik ni Ferdinand sa Manila. Haw-ang na kanunay ang akong sexual life.

Unsaon man pagtambal ni Ferdinand sa akong kahidlaw nga tua man siya sa Manila? Nahisamuyo kong naghunahuna niini.

Usa ka adlaw’ng Sabado niana, mga alas singko sa hapon, miduol si Lorte sa tindahan nga akong gibantayan. Abi ko’g may paliton siya. Gipahibalo lang diay ko niya nga si Clarissa dili makauban nako sa pagkatulog sa balay inigkagabii kay gihilantan kini.

“Puyde bang ikaw lang unay mopuli kang Clarissa?” Mora’g wala ko sa hustong panghunahuna sa pagluwat sa maong mga pulong. -- Sumpayan pa