Sukli sa utang

Gula 213

Sa among panagsulti pinaagi sa long distance call, gisuginlan ko si Ferdinand nga wala siya’y angay kabalak-an bahin sa akong kahimtang sa Bohol kay maayo ang akong pagkabutang.

“Maayo hinuon nga wa kay problema sa imong pagpuyo diha,” nagkanayon si Ferdinand.

“Wa man ko ipaniglain sa imong mga paryente nga atong silingan diri,” giingnan ko siya. “Si Nanay Isabel ra man ang way maayong tinagdan nako.”

“Pasagdi lang na siya. Wa siya’y labot sa atong pagpuyo.”

“Gidedma lang bitaw nako siya.”

Nahilom mi’g makadiyot.

“Gimingaw na baya ko nimo,” wala ko makapugong pagpahungaw sa akong kamingaw kaniya dayong patulo sa akong mga luha.

“Gimingaw na sab ko nimo, Editha,” matud ni Ferdinand. “Sagdi lang. Karong Disyembre, mobakasyon ka diri sa Manila aron magkita ta.”

Nalipay ko sa gisulti ni Ferdinand.

Pagkaugma mibiyahe ko paingon sa Tagbilaran aron pagkobra sa kuwartang ipadala ni Ferdinand pinaagi sa bank-to-bank.

Sa akong pagpauli sa Mabini, gikasakay nako si Lorte, ang manghod ni Godo nga amahan ni Clarissa nga maoy akong kauban sa balay panahon sa kagabhion. Nag-eskuyla si Lorte sa Tagbilaran sa kursong nautical. Kay adlaw na man nga Biyernes maong mipauli siya sa Mabini.

Nagtupad mi’g lingkoranan sa bus nga among gisakyan.

“Nakauyon ka ba sa imong pagpuyo dinhi sa Bohol?” Gipangutana ko ni Lorte samtang nagdagan ang bus nga among gisakyan paingon sa Mabini.

“Oo,” laktod kong tubag. “Sa sinugdan gilaayan ko. Pero dihang daghan na ko’g mga kaila, komportable na ko.”

“Maayo hinuon. Aron dili sab mahasol si Agaw Ferdinand didto sa Manila. Mabalak-on ra ba tong tawhana.”

Wala na ko motubay sa iyang gisulti. Pagkataudtaod, mipalain mi’g tema sa hilisgotan. Nagkalainlain lang butang ang among gituki hangtod nga nahiabot mi sa barangay Tambo sa lungsod sa Mabini.

Pagkanaog namo sa bus, gitabangan ko’g bitbit ni Lorte sa akong mga kinompra. Gihatod niya kini hangtod sa sala sa balay.

Pagkagabii, wala dayon ko makatulog. Maoy akong gihunahuna si Ferdinand. Gimingaw ko niya. Gihidlaw ko sa iyang mga gakos ug mga halok. -- Sumpayan pa