Nawakwak tungod sa bingka ni Soling

Alegre kaayo ang tindahan ni Soling basta magluto na siya og bingka kay magtapok man dayon ang mga ulitawo nga magpaabot sa giluto nga bingka sa dalaga.

Ingon gyud niini ang sitwasyon basta ma-Sabado kay niining adlawa ra man nga makahigayon si Soling sa iyang pagluto sa bingka. Dili taga dinhi sa balangay sa Sangig si Soling.

Taga isla sa Pulopangdan ang dalaga. Mikuyog lang siya ni nang Garia kay matud pa pag-umangkon man kuno kini sa bana ni nang Garia nga si Pilo nga taudtaod nang mipanaw sa laing kalibotan.

Buotan kini si Soling kay siya may mohikutar sa mga bulohaton sa balay ug wala na kaayo’y atimanon si nang Garia kay gibuhat na man ni Soling. Usa sa giganahan ni nang Garia mao ang pagluto ni Soling og bingka. Nindot kaayo kining moluto ug husto kaayo sa kalami ang templada niini sa bingka. Mao bitaw nga kutob sa makatilaw sa bingka ni Soling magpangita gyud ug mohangyo na lang sa dalaga nga magluto na kini og bingka.

“Lamia sa bingka ni Soling, uy, bay Minok,” ni Bugoy pa nga misugilon ngadto sa suod niyang higala nga mananagat usab sama kaniya. “Lami kaayo ang pagkatimpla ug morag di na ko moundang sa pagkaon...”

“Nakakaon bitaw ko anang bingka ni Soling, bay Bugoy, ug lami gyud kay sa bingka ni Abyang...” dihay pahiyom sa mga ngabil ni Minok nga mitubag.

“Abi nimo, Bay Minok, ato-ato ra ni, ha, ibog kaayo kong Soling, kay gawas nga guwapa siya, bigot kaayo ang iyang lawas,” seryoso nga namulong si Bugoy.

“Aw, unsa pa may imong gidugayan, bay Bugoy, ulitawhi dayon si Soling kay basin og maunhan kang Sopring, maila ra ba sad nga naibog si Sopring kang Soling,” ni Minok pa nga nagpanilap.

Tuod man, nianang pagka gabii, miadto dayon si Bugoy sa balay ni nang Garia diin magpuyo si Soling. Samtang naglakaw siya subay sa dalandalan may nabati siyang tingog sa Wakwak. Mora’g naa lang sa iyang duol ang wakwak apan wala niya kini panumbalinga. Naglibog si Bugoy kay sukad masukad karon pa mahitabo nga dunay tingog sa wakwak nga iyang nabati kay kadaghan na gud siya magabhian inig pauli.

Unya may kalit nga mitugpa sa may unahan og gamay. Usa ka babaye ang nakita ni Bugoy apan dili niya maklaro ang nawong kay ngitngit ug ang Buwan wa pa mosubang.

Mibirig ang babaye ug dinhi gibati og kakulba si Bugoy apan wa siya magpadaog sa iyang gibati. Dihang mihamag ang babaye iya dayon kining gisugat ug gigakos ug unya gi-romansa taman sa ginhawa. Mihangos ang babaye ug pagkahuman milukso kini ug kalit lang nahanaw.

Pero, naglibog si Bugoy kay mora’g mibawos og romansa kaniya ang babaye nga ungo. Wala na lang mopadayon si Bugoy sa pag-adto sa ilang Soling kay mora’g wala na siya ganahi.

Pagka-Sabado sa buntag sayong nagluto og bingka si Soling. Seksi kaayo kining nagsul-ob sa pinakigol nga short niini nga giparisan og puti nga t-shirt ug mihulma ang buk-ok niining dughan. May naluto na si Soling nga bingka. Tayming pod sa pag-abot ni Bugoy.

“Naa koy gilain nimong bingka, Bugoy, luto na na,“ niini pa nga nagpadayon sa pagbutang og kalayo sa lutoanan sa bingka.

“Wow, lamia gyud ining imong bingka, uy. Soling,” ni Bugoy pa nga giganahan sa bag-ong haon nga bingka.

“Kuyawa diay nimo mo-romansa, no, Bugoy, lupig man ang usa ka lalaking bold star,” ni Soling pa nga wala motan-aw sa ulitawo.

“Nganong nakasulti ka man ana, Soling?” ni Bugoy pa nga mora’g mikalma na sa pagkaon. “Aw, kuyaw tingali basta ikaw ang akong ika-romansa...”

Igo lang mipahiyom si Soling. Unya nianang pagka gabii nahibulong si Bugoy sa iyang kaugalingon kay nausab ang iyang bayhon. Nahimo siyang usa ka wakwak. Miwakwak siya. Ug dunay mitubag nga mao pay pag-abot, si Soling, nga usa diay ka mangtas nga wakwak.

“Karon, Bugoy, tiwason nato ang atong romansa,” ni Soling pa nga migakos kang Bugoy ug unya nagdapat ang ilang mga ngabil. (Kataposan)