Sukli sa utang

Gula 212 Gula 212

Gihatod ko si Ferdinand hangtod sa gawas sa koral nga kawayan sa among balay. Igo lang gyud ming nakagawas, misugat namo ang suwaw nga kahayag sa head light sa bus nga maoy sakyan ni Ferdinand paingon sa dakbayan sa Tagbilaran.

“Adto na ko,” nagkanayon si Ferdinand human paraha ang nagsingabot nga sakyanan.

“Happy trip,” mao ray akong natubag.

Gihatagan ko si Ferdinand og goodbye kiss sa wala pa siya mosakay sa bus nga mihunong sa among tungod. Dihang nakabiya na ang bus, mibalik ko’g sulod sa balay. Pero wala na ko makatulog hangtod sa kabuntagon. Nagpaabot na lang kong mohayag sa hingpit ang kalibotan.

Sa unang adlaw nga nag-inusara ko sa balay, gihimo kong busy ang akong kaugalingon pag-atiman sa daghang mga bulohaton sulod sa panimalay. Sa ingon, dili mosamot ang akong kamingaw kang Ferdinand.

Pagkagabii, nahiabot si Clarissa sa balay. Siya’y akong makauban sa pagkatulog matag gabii. Makalingaw si Clarisa. Tabian nga pagka bata. Maantigo sab siyang mosultig tinagalog maong magkasinabtanay mi.

Panahon sa adlawan, usa sa gihimo kong kalingawan, mao ang pagbantay sa tindahan nga adjacent ra sa among balay. Gawas sa pagbantay sa tindahan, may panahon pa ko sa pagpanglaba, pagpanglimpiyo sa balay ug uban pang mga bulohaton. Kun wala na koy laing buhaton, motan-aw ko’g salida sa TV aron pagpukan sa kalaay.

Milabay ang usa ka semana. Kadali ra kong naka-adjust sa kinabuhi sa probinsiya. Ingon sa dili na kaayo boring ang akong mga takna dihang nakabaton na ko’g mga kaila ug mga higala. Namatikdan ko nga gaan kaayo’g kabubut-on kanako ang akong mga silingan nga Bol-anon nga mga paryente ra sab ni Ferdinand. Ang akong ugangan ra gyud nga si Nanay Isabel maoy walay maayong tinagdan nako. Gipasagdan ko na lang siya. Total, wala na man ko magpuyo sa iyang balay.

Paglabay sa dul-an sa usa ka bulan, miadto ko sa kinapusoran sa lungsod sa Mabini. Nanawag ko kang Ferdinand sa long distance. Gipahibalo ko siya nga hapit na mahurot ang kuwarta nga iyang gibilin nako.

“Magpadala ko ugma dayon,” mipasalig si Ferdinand. “Kuhaa sa Tagbilaran. Sa PNB.

Human sa among panagsulti bahin sa kuwarta, nangumosta siya sa akong kahimtang sa Bohol. -- Sumpayan pa