Kilometro 35

Gula 49

Human sa subsob nilang operations, mi-lie low ang mga vigilante nga sakop ni Fernan Rivas. Init na kaayo ang kapolisan kanila tungod sa kadaghan na sa mga kriminal ug badlongon sa katilingban nga ilang napatay.

Wala una sila magpasaya-saya. Nagpalinawlinaw una sila. Safe man sila sa ilang pagtago sa balay ni Fernan nga nahimutang sa bukirang bahin sa siyudad sa Obic. Dili daling tultolon ang maong dapit.

“Gusto ko nang ipadayon ang pagpanimalos sa grupo ni Sheldon,” giingnan ko si Fernan usa ka gabii niana sulod sa iyang lawak.

Mao pa gyuy pagkahuman namo’g tagay sa kalalim sa panaghilawas. Nabatyagan ko pa gani ang after glow human sa among gibuhat.

“Di kana problema,” ni Fernan pa. “Andam kami sa kanunay sa pag-abag nimo aron matuman ang imong pagpanimalos.”

“Si Lyle Cubillo ang akong isunod,” dali kong hukom.

“Okey. Ipa-surveillance ko dayon siya sa akong mga sakop.”

Ug sa makausa pa, gitugyan ko kang Fernan ang akong kaugalingon. Tugob sa kainit ang among panagsawo sa potaheng langitnon.

Ang kahilom sulod sa lawak gitugaw lang sa among mga hangos ug agumod. Usahay mopatigbabaw ang inigot sa kama nga maoy nagsangga kanamo.

Migawas na ko sa lawak ni Fernan human sa mainiton namong pagpinarayganay. Dihang mitadlas na ko sa wanang sa sala, namatikdan ko nga abli ang front door. Na-curious ko sa akong nadiskobrehan. Mihinay ko’g paduol sa pultahan aron magsusi nganong naabli kini.

Maoy akong nakita didto sa gawas ang bayhon ni Bredhart. Naglingkod siya sa lingkoranang gama sa puthaw ug naghinuktok. Mora’g lawom kaayo ang iyang gihunahuna! -- Sumpayan pa