Sukli sa utang

Gula 210

Dili nako ma-imagine ang kamingaw ug kalaay nga ako unyang bation kun mobalik na si Ferdinand ngadto sa Manila. Wala gud koy mga paryente sa Bohol. Hapit tanang mga tawo sa barangay Tambo paryente ni Ferdinand pero dili ko man sila paryenteng pursoso. Mao nga mingaw ug laay gyud tingali ang akong kinabuhi sa Tambo kun mobalik na ang akong bana ngadto sa kaulohan.

Pagkasunod adlaw, gipahibalo ko ni Ferdinand nga nakadesisyon na siya kun kanus-a molarga balik ngadto sa Manila. Inigka-Domingo mogikan na siya. Ug kay wala may barko sa Tagbilaran paingon sa Manila nianang adlawa, mosakay siya’g barko paingon sa Cebu diin adto na siya manukad pagsakay og laing barko paingon sa Manila.

“May gisabot na kong bata nga maoy imong kauban dinhi matag gabii,” nagkanayon si Ferdinand. “Aron ba dili ka bation og kahadlok nga mao rang usa nga matulog.”

“Kinsa man nang bata nga imong giingon nga bata?” Gipangutana ko siya.

“Si Clarissa, anak ra sab sa akong ig-agaw nga si Godo.”

“Buotan ba nang bataa?”

“Oo. Kasaligan na siya. Onse anyos na man siya.”

“Maayo hinuon nga siya’y akong makauban dinhi matag gabii. Abi ko’g ako ra gyung usa ang matulog dinhi sa atong balay panahon sa kagabhion.”

“Kinahanglang may kauban ka. Labina panahon sa kagabhion. Di pa ra ba ka suheto dinhi.”

Miabot ang adlaw’ng Sabado. Nangandam na si Ferdinand sa iyang mga dad-onon pagbalik ngadto sa Manila. Magdala siya’g mga lagutmon nga iyang igasa sa iyang amo nga si Mr. Dee. Gipangayo lang niya ang usa ka bulig nga saging ug usa ka latang ubi nga kinampay gikan sa iyang ig-agaw nga si Neo. May gipakapin pa kini’g hatag nga manok himungaan.

Nakaingon kos hilom nga nindot diay puy-an ang probinsiya kay may mga pagkaon man nga kinahanglang paliton sa siyudad apan ipanghatag lang sa mga mag-uuma sa probinsiya.

Nianang pagkagabii, naandam na ang tanan. Misulod na mi sa kuwarto. Mas maayong makatulog og sayo kay inigka kaadlawon mosakay ra ba si Ferdinand sa Silagan Express Line, ang bugtong bus nga magbiyahean sa Tambo niadtong panahona.

Pero dihang nanghigda na mi, mora man og dili gustong matulog si Ferdinand. Iya man hinuon kong gitandayan. -- Sumpayan pa