Gula 48
Base sa resulta sa imbestigasyon nga gihimo ni SPO2 Raulito Jumaoan, ang biktima nag-angkas sa motorsiklo nga gimaneho sa iyang bana.
Pag-abot nila sa Tres de Mayo St. sa siyudad sa Obic, kalit lang mihiyos ang usa ka ligid sa motorsiklo nga ilang gisakyan hinungdan nga napugos sila pagbaktas aron mangitag vulcanizing shop.
Nag-una sa paglakaw ang biktima samtang nagsunod ang iyang bana nga nagguyod sa motorsiklo dihang kalit lang siyang gisugat sa wala mailhi nga lalaki ug gilabni ang iyang shoulder bag.
Wala buhii sa biktima ang iyang bag hinungdan nga milanit ang suspek sa armas niini ug gibunalan ang biktima sa pul-an sa armas. Dihang natumba ug nakuyapan ang biktima, misirit ang suspek palayo sa dapit dala na ang bag sa makaluluoy nga biktima.
Pinaagi sa rogue’s gallery sa buhatan sa kapolisan, nailhan sa bana sa biktima ang isnatser nga milabni sa bag sa iyang asawa.
“Pangitaa ninyo kining tawhana,” giingnan ni Fernan si Bredhart nga ang gipasabot mao ang isnatser. “Sa higayon nga inyo na siyang makit-an, ayaw ninyo siya binlig gininhawa.”
“Matuman, Boss,” sanong ni Bredhart.
Ug niana dayong adlawa, miadto si Bredhart sa kinapusoran sa siyudad sa Obic. Sa ilang pagpauli nianang pagkahapon, dala na nila ang balita sa kalamposan. Gitipi nila ang isnatser samtang kini nagkaon og bikswit sa usa ka tindahan dili layo sa Pier 3.
Ug nagpadayon ang operasyon sa mga vigilante. Usa ka dispatser nga may criminal record ang ilang gitumba sulod sa terminal. Gisundan kini sa paglikidar nila sa walo ka lalaki nga suspek sa pagtulis sa duha ka pawnshop sa barangay Canawa. Ang labing ulahi mao ang pagtipi nila sa notadong street pusher og shabu sa barangay Magbuhis! -- Sumpayan pa