Life must go on

Dugay kong gitutokan ang picture ni Orland. Ang ambongan niyang nawong nahumod sa akong mga luha. Hapit tanan kong panahon gihatag ko kaniya. Bisan ang akong pagtungha usahay maapektohan kun makig-date siya nako. Love gyod nako kaayo si Orland. Apan luyo ning tanan, nakahimo pa siya pagbudhi nako.

"Thank you nga ako ang imong gisugot, Shiela. Isaad ko, di tika pasakitan."

Samtang nagpadayon ako paghilak sa sulod sa akong lawak, nahinumdom ako sa gisaad ni Orland nako dihang gidawat ko ang iyang gugma. Duha silang nangulitawo nako. Si Mon. Guwapo sab si Mon, nagtungha sa komersiyo sa usa ka unibersidad sa Sugbu. Hinuon, di siya sama kang Orland nga anak og adunahan ug nag-eskuyla sa inila ug class nga university.

"Laoman ko kanang imong promise nako, Orland."

Malipayon kaayo ako sa pagdawat ko sa gugma sa ulitawo. Apan bakakon diay siya. Duha diay kaming babaye sa iyang kinabuhi. Nasakpan ko sila sa akto nga malipayong nangaon sa Jollibee sa Colon.

"Nganong nakahimo ka sa paglimbong nako, Orland? Unsay akong sala nimo?" Nagbakho kong misukmat sa ulitawo dihang nagkasulti kami.

"Wa kay sala, Shiela. Apan di diay ikaw ang akong gimahal. I'm very sorry."

"Shit! I hate you, Orland! I hate you!"

Gitulisok ko ang ulitawo. Naulaw siya nga mibiya nako. Nagduko. Usa ka talan-awon nga naghulagway sa tawo nga mabudhion. Ug karon, tulo na ka adlaw kong wa mosulod sa akong klase. Gikaguol ko kaayo ang gibuhat sa akong hinigugma nako.

Migawas ko dihang gipahibalo ako sa among landlady nga may bisita ako. Si Olga. Akong best friend ug silingan sa among lungsod sa Santa Fe. Namatikdan dayon niya ang nanghubag kong mga mata dihang giatubang ko siya sa sala sa boarding house nga akong gipuy-an.

"Iamong mo ba ang imong kaugmaon sa usa ka lalaki nga traydor, Shiela? Ayaw, uy. Timan-i nga naglaom ang imong mga ginikanan nga molampos ka sa college. Kalimti si Orland."

"Sakit kaayo ang iyang gibuhat nako, Olga." Nakahilak na sab ko.

"Bisan unsa kasakit ang moabot nato, Shiela, kinahanglang magpakalig-on ta. Life must go on."

Tungod sa kanunay nga pagtambag ni Olga nako, sa kanunay niyang pagdasig nako, inanay kong nadawat ang nahitabo sa among relationship ni Orland. Inanay kong namatud-an nga di lang siya ang lalaki dinhi sa kalibotan. Ug nakita ko ang lalaki nga alang nako. Si Mon. Mibalik siya pagpangulitawo nako pagkasayod nga nagkabulag na kami si Orland.

"Ikaw gihapon ang akong love, Shiela. Wa mausab ang pagtan-aw ko nimo. Tagai akog higayon nga   mapamatud-an ko kini nimo."

"Di ka lisod mahalon, Mon. Dili."

Hingpit nang nahanaw sa akong hunahuna si Orland sa pagpanglabay sa mga adlaw. Malipayon na ako sa akong kinabuhi. Gidawat ko ang gugma ni Mon kay nakita gyod nako nga nagmatinud-anon siya sa iyang tinguha nako.

"Lahi ako kang Orland, Shiela. Promise, di ko buhaton ang iyang gibuhat nimo."

Wa magbakak si Mon. Misamot ang among kasuod sa paglabay sa panahon. Buotan kaayo siya nako. Faithful siya nako. Ug nagpasalamat ako kang Olga. Husto siya. Life must go on bisan pa unsa kabug-at ang mga kasakit nga moabot sa tawo.

Uban kang Mon ug sa among gugma, nagsinaaray kami nga kami lang gyod sa tibuok namong kinabuhi. (Kataposan)