Sukli sa utang

Gula 209

Nakasabot si Ferdinand nganong dili ko komportable sa pagpuyo sa balay sa iyang inahan maong iya kong gialam-alaman.

“Ayaw na lang gud hatagi’g gibug-aton ang gipakitang taras ni Nanay nganha nimo,” nagkanayon si Ferdinand.

“Mao man bitaw nay akong gibuhat,” giingnan nako si Ferdinand. “Pero lain gyud kaayong hunahunaon. Kanunay ra ba ko niyang pasingit-singitan og estorya. Maglagot gani ko ug dili na makalugway sa akong pailob, tubagon ko man unya kana siya. Bahala na’g unsay iyang ikasulti bahin nako.”

Sa tinguha nga makabalhin dayon mi’g puyo gikan sa balay ni Nanay Isabel, gipatrabaho dayon ni Ferdinand ang kaugalingon namong balay. Ang luna nga gitukoran sa among balay kasikbit ra sa gitarokan sa balay sa manghod ni Ferdinand nga si Grace, kinsa naminyo na ngadto sa usa ka mananahi kansang kagikan naggunad sa Cebu.

Gipaspasan ang pagtrabaho sa balay namo ni Ferdinand nga gidapatan sa semento, kahoy ug sin. Mga paryente ra sab ni Ferdinand ang tulo ka panday nga maoy nagtambayayong pagtukod sa among balay. Dali ra gyud ang pagtrabaho basta kuwarta maoy palihokon. Maayo kay may tinigom si Ferdinand nga kuwarta sa banko. Kini iyang gigamit pagpatukod sa among balay. Kadali rang nahuman pagtukod ang balay.

Yano lang ang desinyo sa among balay. Dili kaayo nindot apan sa dapit nila ni Ferdinand, ang among balay maisip na nga arang-arang. Ang atubangang bahin niini gibuhatan og extension nga maoy gihimong tindahan. Gipahakot dayon ni Ferdinand ang among mga gamit gikan sa balay ni Nanay Isabel. Mga ig-agaw ra sab ni Ferdinand ang nanghakot sa among mga butang aron kini ibalhin ngadto sa bag-o namong pinuy-anan.

“Mobalik na ko sa Manila,” giingnan ko ni Ferdinand dihang nahuman na ang pag-blessing sa among bag-ong balay.

“Ikaw ang mag-igo,” yano kong tubag. “Kanus-a ka man mogikan?”

“Wa pa ko makadesisyon kun kanus-a. Manawag una ko ni Mr. Dee sa long distance.”

“Maayo gani kay nakabaton ka og amo nga mosugot lang bisan unsang orasa ka mobalik og trabaho, no?”

“Bitaw. Buotan kaayo si Mr. Dee.”

“Unya, kalit lang kong mibati og kasubo. Misantop man gud sa akong hunahuna nga kun mobalik na si Ferdinand sa Manila, mag-inusara na lang unya ko’g puyo sa among balay. -- Sumpayan pa