Sukli sa utang

Gula 208

Nahinayon gayod ang paglarga namo ni Ferdinand paingon sa Bohol nianang pagka Lunes. Nanghuwam siya sa sakyanan ni Mr. Dee nga maoy gikargahan sa among mga gamit paingon sa pier. Wala magmakuli si Mr. Dee sa pagpagamit sa iyang sakyanan namo sanglit suod man lagi kaayo sila si Ferdinand.

“Paaboton ko ang imong pagbalik,” nagkanayon si Mr. Dee kun sa Binisaya pa kay tinagalog man ang panagsulti nila ni Ferdinand.

Bag-o lang gyung nahuman pagdiskarga ang among gamit gikan sa sakyanan ni Mr. Dee niadtong tungora. Midugok dayon ang mga porter sa pier apan wala ko lang sila tagda. Gibantayan ko lang nga walay makapanghilabot sa gidala namong mga butang.

“Daghang salamat, Kuya,” giingnan ni Ferdinand si Mr. Dee.

“Pahibaloa lang ko kun duna kay problema didto sa probinsiya.”

“Oo, Kuya.”

Dihang nakabiya na si Mr. Dee sa pier, mi-hire si Ferdinand og upat ka porter nga maoy iyang gipahakot sa among mga butang paingon ngadto sa taas sa barko nga among sakyan.

Pag-abot namo sa Bohol, didto mi modayon sa balay sa inahan ni Ferdinand. Wala man mi laing kaabtan didto gawas sa balay sa iyang inahan. Lain man sab hunahunaon kun adto mi moabot sa pagsaka sa balay sa iyang mga paryente.

Namatikdan ko nga bug-at gihapon og buot si Nanay Isabel ngari nako. Ambot kun unsay nakaon sa lagas nga morag gusto man gyud ko niyang kontrahan nga unta wala man ko makahimog sala ngadto niya? Ang iya lang gyung kahangol sa kuwarta maoy nakaingon sa kangil-ad sa taras nga iyang gipakita nako. Mora’g dili gyud siya gustong makapahimulos ko sa kuwarta ni Ferdinand. Gusto niya nga sama kaniadto sa ulitawo pa si Ferdinand, ma-solo niya ang kinitaan niini.

Pero dili na kini mahimo karon nga minyo na si Ferdinand. May katungod na ko sa paggawi sa kinitaan sa akong bana.

Wala lang nako tagda ang uga nga tinagdan ni Nanay Isabel nako. Ang importante mao ang pagsinabtanay namo ni Ferdinand.

“Miyentras tanto lang ta dinhi sa balay ni nanay,” ni Ferdinand pa. “Mamalhin dayon ta kun mahuman nag tukod ang atong balay.”

“Kinahanglan gyud, Ferdi,” nako pa. “Di ko komportable nga mangipon pagpuyo og dugay sa imong inahan.”-- Sumpayan pa