Sukli sa utang

Gula 202

Nagpadayon ang init namong romansa. Sanglit anad na man sab si Troy sa paglipay og babaye, kadali ra niyang natukbil ang akong gana. Ingon sa may kainit nga mialisngaw sa akong lawas samtang gikaligoan ko’g halok ni Troy.

Milunga sa makadiyot si Troy uban ang paghangos. Unya pagbalik niya’g indayog, misamot ang kapaspas sa lihok. Nauyog ang tibuok kong lawas.

“Editha....” gituaw niya ang akong ngalan dihang nakapabuto na siya.

“Troy...” gikatuaw sab nako ang iyang ngalan dihang naapsan ko siya ug nagdungan mi’g sangko sa kinatumyan sa kalalim.

Namahulay una mi. Nagpahuwas sa kakutas nga mihakop kanamo. Paglabay sa pipila ka gutlo, mitapuko na sab si Troy nako.

Lapas na sa alas singko sa kahaponon sa akong paggawas sa balay nga gipuy-an ni Troy sa Pasay. Midiretso ko’g pauli sa condo nga gipuy-an namo ni Ferdinand sa Alabang.

Nagsiga na ang suga sa among condo unit sa akong pag-abot.

Nahiabot na diay si Ferdinand sa balay. Kalit lang kong gikulbaan. Wala ko masayod kun unsay maayong alibi kun mangutana si Ferdinand nganong wala ko sa balay sa iyang pag-abot.

Kini laging sad-an ta, usahay defensive ra ta kaayo. Advanced pa gyud ang atong hunahuna. Natural lang tingali alang sa tawong nakasala nga managana gyud, dili gustong matugkan og katahap ang binuhat nga iyang nasad-an. Mao nga nagpanagana ko’g pakigsulti ni Ferdinand.

“Diin ka man gikan?” gisugat ko niya’g pangutana.

“Diha ra man sa Alabang Metropolis,” namakak ko. “Nag-window shopping lang. Wa ko molakaw kaganina kay init kaayo ang panahon. Hapit na ang alas singko sa akong paggikan maong karon lang ko nakabalik bisan duol ra ang akong giadtoan.”

“Wa man lagi kay dalang mga pinalit?”

“Da, wa koy nagustohan. Nalingaw lang ko’g ukay-ukay sa mga display sulod sa department store.”

Wala na mangusisa si Ferdinand. Nalipay ko sa hilom.

Dihang wala na gyud siya mopasupot og dugang pangutana, misulod ko sa among lawak ug nag-ilis. Pagkahuman, migawas ko ug mipadayugdog sa kosina aron maghikay na sa among panihapon.

Ang kinawat-kawat nga panagtagbo namo ni Troy sa balay nga iyang gipuy-an sa Pasay nasubli sa daghang mga higayon.

Kasagaran, siya’y manawag nako sa telepono aron pagsuta kun makahigayon ba ko sa pagpakigkita kaniya. Wala gyud ko’y pagbalibad kay pirme man kong bakante ug naa ra sa balay kanunay, nagpadako sa buray...!

Sa matag higayon nga magkita mi si Troy didto sa iyang gipuy-an, mahitabo gyud ang init nga pagpinarayganay.

Tungod kay nag-amping man gyud ko sa akong mga lihok, nagtuo kong wala gayod magbaton og katahap si Ferdinand nga nagluib ko sa among kaminyoon. Milungtad nag pito ka bulan ang relasyon namo ni Troy.

Hangtod nga usa ka gabii niana, human sa lovemaking session namo Ferdinand, gipadayag niya kanako ang iyang plano alang namong duha. Gusto niya nga adto na mi manimuyo sa Bohol.

Nakugang ko pag-ayo sa iyang gisulti. -- Sumpayan pa