Kilometro 35

Gula 40

Naniga ang mga mata ni Kurt dihang gitionan ko na siya sa armas nga may silencer nga akong gigunitan. Nakalitan ug gikuyawan siya.

“Oras na sa pagpaningil, Kurt,” giingnan ko siya.

“K-kinsa ka?” Nakapangutana siya nga wala makaila nako gumikan sa akong pagtakoban. “U-unsay akong sala kanimo?”

“Nahinumdom ka sa krimen nga nahitabo didto sa Kilometro 35?”

“W-wa ko masayod nianang imong gipanulti!”

Aron wala nay daghang kutikuti, gikuha ko gikan sa akong ulo ang wig nga akong gisul-ob aron iya kong mailhan.

“S-sandra!” Misamot pagsiga ang mga mata ni Kurt. “I-ikaw kini!”

“Ako bitaw,” matud ko dayong kablit sa gatilyo sa armas nga may silencer nga akong gigunitan.

Tsug! Tsug! Tsug! Tsug! Tsug! Tsug! Tsug!

Wala na gayod makahimo si Kurt sa pagpanalipod sa iyang kaugalingon dihang ako siyang gipusil. Naigo siya sa lainlaing parte sa iyang lawas. Nahagba siya sa salog sa sulod sa elevator. Mikirig!

Paghunong sa elevator, migawas dayon ko. Midali ko pagbiya sa maong dapit samtang wala pa madiskitahi ang patay’ng lawas ni Kurt sulod sa elevator. Ingon sa gibuligan sab ko sa kahigayonan kay wala may mga tawo nga naghulat sa gawas sa elevator sa pagkabukas sa pultahan niini.

Igo lang kong nakagawas sa main lobby sa Vallecera Centrum building, mihunong sa akong tungod ang getaway vehicle nga gimaneho ni Bredhart. Naabli dihadiha ang pultahan sa tuong habig niini.

“Sakay,” ni Bredhart pa. “Dali!”

Misakay dayon ko. Wala pa gani ko makahuman og sira sa pultahan, gipadagan na ni Bredhart ang sakyanan. Pero wala pa gani makadagan og layo ang among gisakyan, nakamatikod ko nga may nagsunod namo nga patrol car. -- Sumpayan pa