Kilometro 35

Wala dangtig dugay, nalantawan ko si Kurt nga naglakaw sa sidewalk. Misurok ang akong dugo nga nagtan-aw kaniya nga kompiyansa kaayong naglakaw paduol sa nahimutangan sa awtong gisakyan namo ni Fernan.

Hapit ko wala makapugong sa akong kaugalingon. Kun wala pa ko pugngi ni Fernan, gipusil ko na unta si Kurt samtang nagkaduol kini sa among nahimutangan. Naglungotlungot na ko nga makabalos niya.

"Dili mahimong anhi mo siya birahi," gipasabot ko ni Fernan. "Gawas nga daghang tawo dinhi, duol pa gyod sa presento sa kapolisan kining dapita busa mameligro ka."

Igo na lang kong mitan-aw kang Kurt nga miagi sa among tungod.

"Asa man kaha to siya paingon," Nakapangutana si Fernan dihang misaylo na si Kurt sa among nahimutangan.

"Posibleng moanha siya diha sa Vallecera Centrum building," gitudlo ko ang habog nga building sa unahan nga nag-atubang sa rotonda.

"Mag-unsa man siya diha?"

"Naa diha mag-opisina ang iyang inahan nga usa ka practicing lawyer."

"Di gyod diay basta-basta og pamilya si Kurt Tumelden. Gawas nga city administrator ang amahan, abogada pa gyod ang inahan."

"Tinuod kana. Ug mao nay iyang gisaligan sa iyang pagpangabuso uban sa sinagop sa mayor sa siyudad sa Lumantaw nga si Sheldon Abrigos."

Gibuksan ko ang pultahan sa sakyanan nga tungod sa akong gilingkoran ug nanaog.

"Asa ka?" nangutana si Fernan.

"Sundan nako si Kurt," mubo kong tubag.

"Pag-amping," niya pa nga misunod pagkanaog. "Magsunod lang ko nimo."

Dihadiha milakaw ko. Gisundan nako si Kurt sa igong gilay-on. Wala gyod nako bulagi si Kurt sa akong panan-aw! (Sumpayan pa)