Mag-pit Senyor ta, Gaw

Ning masadyang adlaw sa Pista Senyor ania na usab kami si Agaw Mar sa siyudad sa Sugbu, nagpahiluna paglingkod atubangan sa usa ka lamesa, sulod sa usa ka imnanan.

Way puas ang among tinagayay sa ilimnon nga Red Horse nga beer! Upat na ka grandeng Red Horse ang among nabaseyo. Mao kini ang naandan namong tulomanon matag Sinulog.

Imbes motan-aw sa nagkalainlaing contingents nga misalmot sa gipahigayong sinulog sa kadalanan, magkalingaw mi sa pag-inom og beer, nunot ang kumostahay diha sa way hunong namo nga pagpanulat og mga tampo sa Banat News ug sa uban pa nga mga tabloid ug magasing binisaya.

“Bida, Gaw Mar! Bisan upaw ug dangas na kaayo nang imong ulo ug agtang, nagpabilin gihapon ang imong pagka-Turkohon og dagway! Tsikboy ba gihapon?” sukot ko sa akong Agaw nga writer, nga parehas nako, pula na kaayo ang nawong. Sa gawas, padayong nabati namo ang repeke sa mga tambol sa kadalanan.

Nagkihatkihat si Agaw Mar nga nagtingsi nga mitutok nako.

“Aw, permanenteng piti gihapon ang garter sa panti, Gaw Fred! Gawas sa imong Agaw Mayling nga morag hinay na sa hinamagay sa kama, dumdom lang ko pirme sa akong suking mamords sa Kamagayan, ilabi na human ko’g kobra sa akong agi sa Banat News...!” nagkihatkihat pa nako si Agaw Mar.

“Haylabi’g moadto ta karon sa suki kos Kamagayan, Gaw!” aghat na sab sa pilyo kong Agaw ngari nako. Igo ko lamang nga gipahiyoman si Agaw Mar nga miagni usab kaniya.

“Atol ning Sinulog karon, Gaw Mar, dapiton ug dad-on tika sa dapit nga bag-o kong suki! Apan hutdon una nato kining laing duha ka grande sa Red Horse, aron makompleto nato ang usa ka case...!” gidasig ko si Agaw nga nagpangidlap ang mga mata sa akong gisulti. Gidungan namo sa pagtiti ang nahabiling beer.

Kay nagdahom ug nagtuo nga dad-on ko siya sa suki kong mga seksing babaye sa usa ka casa, hilabihang abtika ni Agaw Mar nga mikuyog nako.

“Basta tsiks, Gaw Fred, di gyud tika balibaran...!” ni Agaw Mar nga miagbay nako sa among pagpamidpid og lakaw sa aseras nga dasok gihapon sa mga tawo nga buot mosaksi sa gipahigayong Sinulog sa kadalanan.

Hilabihan nga kahibulong ni Agaw Mar sa dihang didto mi mosangko sa simbahan sa Basilica del Santo Niño. Nagpahiyom ko nga mipikpik sa abaga sa akong Agaw.

“Gaw Mar, mohalok tas imahen ni Senyor Santo Niño, bahala nag madugay ta. Iya ron nga kapistahan! Magbag-o sab ta, Gaw, bag-ong tulomanon matag Sinulog...!”

Nakapahiyom usab si Agaw Mar nga nakasabot sa buot kong ipalungtad. Mitutok siya nako.

“Bitaw, Gaw Fred! Sus, maayo kay nakahunahuna ka ini! Mag-Pit Senyor ta, Gaw...!”

“Oo, Gaw Mar! Mag-Pit Senyor ta! Viva Senyor Santo Niño...!”

Ug unya, malipayon mi si Agaw Mar nga mitipon sa linya sa mga debotos aron sa paghalok ug pagsinulog atubangan sa imahen ni Senyor Santo Niño. (Kataposan)