Surprisa ni Sr. Sto Niño

Ang kamingaw sa ginikanan sakit baya! mao ning mga pulong na-teks ni Desta sayong buntag sa iyang pagmata. Nibangon lang siya ug nilingkod sa lantay sulod sa iyang lawak. Nangabli siya sa bintana aron may dan-ag na sa alas sayis nga kabuntagon. Nagtulo na sab iyang luha. Naghingohingos.

"Kun bali wala ni nimo karon, makaamgo ka ra unya kun ikaw nay buhatan sa ingon sa imo mismong anak!" dugang niya sa teks.

Natud-an sa luha ang screen sa selpon sa pagduko niya. Nakahukom siyang katapusan na ni niyang teks. Kay useless man. Di man mobawos si Israel kamaguwangan nilang anak ni Benhur.

Namat-an siyas kapikas nga nagsige’g sud-ong sa selpon sa iyang tuong kamot.

"O! Mao lagi gyud nay gidangat nato! Dunay mga modernong kahimanan sa kumonikasyon, unya wa gihapoy silbi. Nagdugang sa gastohan ug nagdugang sa kahasol ug kaguol. Ayaw na pagteks-teks anang imong anak. Ingna siya sa kataposang higayon 'unya na ba lang mo moduaw namo kun nagpiyong na mi sulod sa lungon? Maayo untag makaduaw mo namo nga may buot pa mi ug magkakulokabildo pata!" pintok ug pinabundak nga pulong sa bana. Nitimbakuwas siya.

Gimingaw na kaayo si Desta ni Israel nga tua namuyo sa Manila. Otso anyos na lang si Daisy ilang apo, kausa ra gyud sila nauli sa Sugbu. Niadtong tuig 2005 pagkasal ni Ishmael ikaduhang anak. Taga-Manila man god ang asawa ni Israel. Ug nakauyon sab siyas iyang panarbaho didto. Nagkinto kuno siyang di mominus iyang performance rating. Ang kamanghurang anak nga si Joel hayskul pa. Ang bana ni Desta nga si Benhur na-stroke ug gipa-retire og sayo sa iyang trabaho isip Bookkeeper sa Green Meadow Stevedoring. Saguyod gamay ang iyang tuong tiil dihang nigawas sa ospital. Si Desta padayon sa iyang trabaho sa pagkamaestra sa saring publiko sa Sibonga. Napulo ka tuig pa una siya maka-retire.

Kun teksan ni Desta iyang anak, di motubag. Kun motubag, ang kanunay'ng balibad nga di kaari, way budget sa pamelete. Di tugtan sa ilang kompanyang gitrabahoan nga mag-leave.

Dakong kompanya ilang gialagaran. Tig-asembol og mga electronic parts. Susama sa Mitsumi Inc. sa Sabang, Danao. Ang asawa ni Israel nga si Ana naa sab magtrabaho sa maong kompanya. Ang ngalan sa kompanya nga Hapon gihapon ang tag-iya "Mahayoko, Inc."

Sugod sa Disyembre sa miaging tuig sige og sinulog si Desta kada Biyernes sa Basilica. Iyang gipangayo nga si Israel mouli aron bisitahon sila. Di man sila kaapord sa plitehan bisag barko lang padulong sa Manila idiabuwelta. Sila gong duha sab iyang bana mangadto. Apan di sab siya gustong silay moadto. Sila may kagasto.

Bisperas sa Pista Senyor nga may Sinulog Festival. Alas kuwatro sa hapon. Samtang nanilhig si Desta sa ilang nataran, may taksi nga nihunong sa daplin sa karsada. Tungod gyud sa ilang gate sa balay ni Desta ug Benhur. Nanaug sa front seat si Israel. Nikuot sa iyang pitaka ug nihatag og bayad sa drayber. Nanaug sa luyo nga pultahan si Ana. Nisunod og kanaug si Daisy. Nabuhian ni Desta ang silhig. Nagdagan siya paingon sa gate.

"Benhur! Dali! Sugata sila. Niabot si Israel, Ana ug Daisy! nagtulo iyang mga luha sa kalipay samtang nagdagan padulong sa gate.

Niamin si Israel niya. Iyang gigakos. Gigakos sab niya si Ana ug si Daisy. Nakauli gyud si Israel ug Ana kuyog pa si Daisy.

"Wa man lang mo nagteks nga moari. Kay sugaton ta mo namo sa airport o sa pantalan ba!" ni Benhur human paghangop niya sa tulong niabot.

"Surprisa ni namo Pa, Ma. Kay wa man sab damha gyud namo nga makaari mi," ni Israel. "Kay si Daisy uban sa iyang mga klasmets, gi-isponsoran sa among kompanya nga mosinulog panahon sa Sinulog Festival isip guest performers," dugang ni Ana.

Gigakos na sab ni Desta si Daisy. Gihapohap iyang ulo pag-ayo sa iyang lolo.

Usa ka semana silang nagkakauban sa Sibonga.

"Bisan untag kada sinulog na lang ta magkita, okey na mi ana!" ni Desta sa dayong pagbiya ni Israel ug pamilya.

Nanglugmaw na sab iyang mga luha.

"Basin pa ma," nagdungan si Israel ug Ana. "Ang Senyor Santo Niño lay agdon namo!" ni Israel. Nangyango si Desta ug Benhur.

"Way arang ni Senyor Santo Niño" tuaw ni Desta sa hilom. (Kataposan)