Sukli sa utang

Gula 193

Gipasabot nako si Jomar nganong si Ferdinand ang nakatubag sa iyang pagtawag kagahapon.

“Nag-sick leave siya kagahapon,” giingnan ko siya.

“Nakugang baya ko pagkadungog nako sa iyang tingog,” matud ni Jomar. “Wa na lang ko motingog aron dili siya magduda nga may lalaki diay nga magtawagan nimo kun wala siya.”

“Husto ang imong gihimo.”

“Unsa may iyang reaksiyon nga wa man motingog ang nanawag sa telepono nga iyang gitubag?”

“Naglagot. Nagtuo siya nga tawong way lingaw ang nanawag.”

Nahilom mi’g kadiyot. Apan pagkilab sa pipila ka daklit, si Jomar ang unang nisulti.

“Puyde bang magkita ta karon?” Sukit ni Jomar.

“Puyde kaayo,” dali kong tubag.

Ug nagsabot mi kun asang dapita na sab mi mag-abot. Human sa among panagsulti sa telepono, nangandam dayon ko. Kadali ra kong nakailis og limpiyong sapot aron makigkita kang Jomar.

Tuod man, nagkaabot gyud mi sa dapit nga among gikasabotan. Ug sama sa kanunay nang nahitabo, didto mi nisangko sa usa ka mabugnaw’ng lawak sa hotel. Didto nagtagbaw mi pagtagay sa lawasnong kalipay.

Nagpadayon ang kinawatkawat nga panagtagbo namo ni Jomar. Gipino gyud nako ang akong mga lihok aron dili makatimaho si Ferdinand nga naghimo ko’g milagro. Sa higayon nga gusto siyang makig-sex nako, dili ko gayod siya balibaran. Sa ingon niini, nagtuo kong mosamot ang iyang pagsalig nga wala ko mag-sideline sa lain.

Dihay higayon nga nagabhian ko’g pauli sa condo unit gikang nakigkita kang Jomar. Si Ferdinand maoy unang nahiabot sa condo gikan sa trabaho. Siya na gani naghikay sa among panihapon. Pero nakalusot lang gihapon ko kay nag-apod man ang akong duha ka kamot sa mga plastik nga gisudlan sa akong mga pinalit sa usa ka mall sa Cubao.

Wala na lang mangutana si Ferdinand kun diin ko gikan dihang iyang nakita nga nagbitbit ko sa akong mga pinalit. Nagpasalamat ko sa hilom nga wala na siya magdaghan pag kutikuti.

Unya, usa ka hapon niana, mitan-aw ko’g salida sa TV samtang nagpaabot nga mahiuli si Ferdinand gikan sa trabaho. Gisal-ot sa salida ang flash report bahin sa usa ka taxi nga nadisgrasya. Ang taxi nga gimaneho ni Jomar! -- Sumpayan pa