Kilometro 35

May banyo sulod sa lawak nga maoy akong giokupar sa balay ni Fernan. Didto midigwa ko taman sa ginhawa. Daw nahabwa ang tanan kong kinaon. Gibati ko ang hilabihang kaluod. Giluod kong naghunahuna sa daghang dugo nga nanggawas sa mga samad ni Ervin nga naigo sa akong pagpusil.

Dihang milurang nag diyotay ang kaluod nga akong gibati, namatikdan ko nga may mga tawo nga misulod sa lawak. Kay abli man ang pultahan sa banyo, nakita ko sila si Fernan ug Bredhart nga misulod. Nahiabot na diay usab sila. Mipaduol sila sa akong nahimutangan.

"Unsa bay nahitabo nimo?" nangutana dayon si Fernan.

"Wa niy kaso," nako pa. "Giluod lang ko. Nabag-ohan tingali ko sa akong gibuhat."

Mikatawa si Fernan. Ug niya, pa, "Ingon gyod niana ang mahitabo kun di ka pa maanad. Pero sa kadugayan, molig-on na ang imong balatian."

"Kriminal na ko, Fernan," nako pa.

"Nagmahay ka ba sa imong gibuhat?"

"Wa. Hinuon gikalipay ko nga nasugdan ko na ang pagpanimalos sa mga tawo nga maoy responsable sa kamatayon sa akong hinigugma ug sa pagbuong sa akong kadungganan."

Human sa taudtaod namong panagsulti, migawas na sila si Fernan ug Bredhart sa akong lawak. Mihigda ko aron makapahulay. Gipiyong ko ang akong mga mata samtang naghayang ibabaw sa humok nga kama.

Nanglabay ang daghang mga gutlo. Wala ko makatulog. Nag-alindasay ko sa akong higdaanan. Unya, misantop sa akong hunahuna si Fernan, ang lider sa mga vigilantes nga naglihok sa Obic City.

Mibangon ko ug migawas sa akong lawak. Miadto ko sa lawak ni Fernan. Serado ang pultahan niini nga akong natukmaan. Nagmingaw. Giliso nako ang seradora. Humok! Dihadiha mihinay kog sulod! (Sumpayan pa)