Sukli sa utang

Gula 189

Nakasabot ko sa pasiaw ni Ondoy pero nahibulong ko nganong nanglipaghong ang nawong ni Ferdinand pagkadungog sa maong tistis. Morag wala siya makauyon sa maong pasiaw sa iyang higala.

“Buotan nis Bay Ferdi,” nagkanayon si Butsoy. “Di ni makamaong mo-sideline sa laing babaye.”

“Bitaw, komedya ra tong ako,” gibawi ni Ondoy ang iyang pasiaw. “Tingalig nalain ka, Bay Ferdi.”

“Okey lang, Bay,” tubag ni Ferdinand nga nagpahiyom na.

Naputol ang paghimamatay sa managhigala dihang mipahibalo na ang mga lumilihok sa kosina nga andam na ang lamesa. Midungan mi si Ferdinand sa pagpamahaw sa iyang mga higala nga bisita.

Human sa pangaon, nakig-inom si Ferdinand sa iyang mga higala. Beer ang ilang giinom. Si Ferdinand ang miabaga sa gasto sa ilang panaghudyaka. Nakadungog ko nga nagbagulbol si Nanay Isabel.

“Nag-usik-usik lang si Ferdinand sa iyang kuwarta nga gibangka sa pagpainom nianang mga tawhana,” didto gipahungaw ni Nanay Isabel ang iyang disgusto sa gihimo sa iyang anak kang Nang Luisa nga kosinera. “Maayo pay gihatag niya nako ang kuwarta nga iyang gigasto pagpalit og mga ilimnon.”

“Sagdi lang god, Nang Sabel,” giingnan siya ni Nang Luisa. “Di man bitaw kana kanunay.”

“Bisan na,” nagpadayon pagbagulbol si Nanay Isabel.”

“Igo na niana,” sa kosinera pa. “Tingalig madunggan ka sa mga bisita ni Ferdinand.”

Sa akong bahin, no comment ko sa pagpainom ni Ferdinand sa iyang mga higala. Wala koy pagsupak sa iyang gihimo maong gipasagdan ko lang siya. Misulod ko sa kuwarto aron makapahulay.

Pagkagabii, gipahigayon ang koronasyon sa rayna-rayna. Kabanay ra sab ni Ferdinand ang gikoronahan nga Miss Tambo. Nanambong mi sa koronasyon. Sa amo nang pagpamauli gikang nanan-aw sa kalingawan, gipakigsultihan nako si Ferdinand sa wala pa mi mangatulog.

“Mamalik na ta sa Manila,” giingnan ko siya.

“Ngano man?” gipangutana ko niya. “Gilaay ka na dinhi sa Bohol?”

Wala ko motubag dayon. Dili mahimong sultihan ko siya nga nakasaway ko sa kinaiya sa iyang inahan nga walay maayong tinagdan nako. -- Sumpayan pa