Kilometro 35

Gula 27

Nahingpit gyud nga usa ka bulan ang pagbansay ug pagtudlo ni Fernan kanako mahitungod sa martial arts. Iya kong gipasabot nga daghan pa ko’g angay makat-onan pero bentaha na lang nga may nakamaohan na ako.

“Dili ka na madali-dali,” niya pa. “Panagana lang ni kun maapiki ka gyud. Bentaha na lang kini kay sa wa gyud kay panagang. Nagkinahanglan ka’g taas nga kutay sa panahon kun gusto kang makakat-on sa hingpit sa martial arts. Ang akong gitudlo nimo mao lang ang labing sayon nga defense mechanism.”

“Daghang salamat sa paggahin mo’g panahon aron ako makakat-on og ginagmay gikan sa lapad mong kahanas sa martial arts,” giingnan ko siya.

“Sa gikaingon ko na, usa kini ka paagi sa pagpangandam sa umaabot mong bulohaton nga mao ang pagpanimalos sa mga tawong nakasala kanimo.”

“Gusto na kong makasugod sa akong pagpanimalos, Fernan.”

“Nag-agad lang mi nimo. Sa akong tan-aw, mora’g puyde ka nang magsugod kun makakat-on ka na paggamit og armas nga mobuto.”

“Kanus-a ko nimo tudloi mahitungod niana?”

“Ugma dayon.”

Tuod man, gibansay gyud ko ni Fernan mahitungod sa hustong paggunit sa armas, pagpahigayon sa saktong puntariya, pagpabuto ug uban pang angay kong makat-onan bahin sa paggamit sa armas nga mobuto. Paglabay sa mga adlaw, inanay kong nakakat-on ug nahanas.

Mora na ko’g si Angelina Jolie, ang babayeng Hollywood star nga hanas kaayong mogamit og armas ug sa bisan unsang matang sa panagsangka. Ug gusto kong masulayan gilayon ang akong katakos.

“Kinsay gusto mong unahon?” Gipangutana ko ni Fernan. “Kinsa nilang pito ang gusto mong unang makatagamtam sa imong panimalos, Sandra?”

“Si Ervin Padios,” dali nakong tubag. -- Sumpayan pa