Kilometro 35

Gula 22

Gipasabot nako si Fernan nga naglagot si Ervin -- ang ikaunom nga lalaki nga milugos nako -- kay gipaak nako ang dalunggan niini. Mao kadtoy hinungdan nga gidakong niini ang akong ulo sa semento hangtod nga nakuyapan ko ug wala na masayod sa sunod nga mga panghitabo.

“Wa silay puangod,” nakaingon si Fernan.

“Gusto tingali sab ko nilang patyon sama sa ilang gibuhat sa akong boyfriend,” nako pa. “Mao nga human sa ilang paglugos nako, ila kong gitambong sa suba.”

Pagkasunod adlaw, gibalikan na ko sa hingpit nga kabaskog. Giatiman ko’g maayo sa mga vigilantes. Nagpakita sila’g dakong respeto sa akong pagka babaye. Lahi ra kaayo sila’g taras nila ni Sheldon ug sa iyang mga barkada nga mitabang sa pagpanamastamas sa akong pagka babaye.

“Unsay plano mo karon?” Gipangutana ko ni Fernan human sa among pamahaw.

“Plano?” Nakasukna ko kay wala makatugkad sa iyang gisulti.

“Oo. Ipahatod ko ikaw sa akong mga sakop kun gusto ka nang mopauli sa inyo.”

“Dili una ko mopauli sa amo.”

“U-unsa?”

“Kun dili ko makasamok ninyo, gusto unta kong magpabilin una dinhi.”

Nahitutok si Fernan kanako. Daw gusto niyang sutaon kun wala ba ko magtiaw sa akong gisulti.

“Mahimo ba, Fernan, ang akong gihangyo?” gipahunat ko siya.

“Apan ang imong mga ginikanan,” ni Fernan pa. “Nakaseguro kong nabalaka na sila karon pag-ayo kay pila na ka adlaw nga wala ka mahiuli. Labina kay napalgang patay ang imong boyfriend nga si Orville.”

“Bahala na,” mubo kong desisyon. -- Sumpayan pa