Kilometro 35

Gula 21

Kay nasugdan ko na man pagsaysay ngadto kang Fernan ang tinud-anay nga nahitabo nako, gisugilon ko na lang gayod ngadto kaniya ang katibuk-an sa mga panghitabo, gikan sa pagpusil ni Sheldon kang Orville didto sa Kilometro 35 hangtod na sa pagdala nila kanako sa usa ka abandonadong bodega diin didto ko nila lugosa.

“Unsay ngalan sa imong boyfriend nga gipatay sa mga lalaking mao say nag-gang rape nimo?” nangutana si Fernan.

“Orville,” dali kong tubag. “Orville Buendia.”

“Husto. Si Orville Buendia...”

“Ngano? Nakaila ka ba diay kaniya?”

“Wala. Nakabati lang ko sa balita kaganinang buntag.”

“Unsang balitaa?”

“May usa ka lalaking nakaplagang patay didto sa Kilometro 35. Dili layo sa nahimutangan sa patay niyang lawas nakaplagan sab sa mga awtoridad ang usa ka motorsiklo nga gitabonan sa mga sagbot.”

“Mao kadto ang gisakyan namong motorsiklo nga na-flat tire. Tungod kay dili na man magamit ang motorsiklo, nakahukom mi si Orville nga manakay na lang og bus nga depasahero paingon sa siyudad. Pero naapsan gyud mi sa demalas kay sakyanan man sa mga banyaga ang among napara.”

Unya...mihilak ko. Wala ko gayod kapugngi ang akong mga luha samtang naghunahuna nga patay na gayod diay si Orville. Kompirmado na gyud nga patay na siya ug naugkat na man gani ang patay niyang lawas.

“Ang akong gikahibudngan kun nganong naglutaw ka man sa suba nga napalgan nila ni Bredhart,” ni Fernan pa pagkilab sa pipila ka daklit.

“Wa koy kasayoran sa misunod nga panghitabo,” maoy akong tubag. “Human sa paglugos nako sa lima ka lalaki, nakuyapan ko dihang gidakong ang akong ulo sa semento sa ikaunom nga lalaki nga miamong-among nako.” -- Sumpayan pa