Ang tawo nga sayong nag-ehersisyo

Karon lang sila si Gaspar ug Bebot nakasayo sa basketbolan sa Kintolimbo. Si Gaspar ang nagdala sa Voit nga bola sa basketbol. Unya, nahibulong sila kay may tawo nga mas sayo pa nila. Alas kuwatro y media pa gud sa kaadlawon. Sirado pa ang tindahan ni Noy Duar nga naa sa amihanang habig sa basketbolan.

Nagsalig lang sila sa dan-ag sa sugang dagitabnon gikan sa duha ka poste sa dalan nga di layo sa basketbolan. Giobserbahan nila’g kadiyot ang tawo. Kun magdribol siya sa bola padulong sa goal sa silangang habig, walang kamot iyang idribol. Wala sang kamot iyang iitsa sa bola ngadto sa ring. Kun magdribol siya sa bola padulong sa goal sa kasadpang habig, tuong kamot iyang gamiton. Ug tuo sang kamot iyang iitsa sa bola. Pihong nag-ehersisyo siya sa iyang duha ka kamot. Di motagad nila ang tawo. Di gani motan-aw nila.

Dihang gigamit na nilang Gaspar ug Bebot ang goal sa kasadpang habig, tua na lang ang tawo magdagandagan tungod sa goal sa silangang habig. Taas siya’g hangin. Morag di kutasan. Pero naputos na sa singot iyang kamisin nga puti.

Mga estudyante sa ikatulong ang-ang sa hayskul si Gaspar ug Bebot. Manag-agaw silang igtagsa. Naa sila puyo sa ilang uyoan nga si Tiyo Dencio nila. Duha ka bulan na silang nagpuyo diha. Si Gaspar anak ni Anton nga kinamaguwangan sa tanan. Si Bebot anak ni Ben nga kamanghuran sa tulo ka managsuon. Kay si Dencio may arang-arang sa tanang managsoon, nakatrabaho man sa Register of Deeds sa Kapitolyo, ug ang asawa maayog negosyo nga karenderya sa silong sa ilang balay, nihangyo si Anton ug Ben nga anha papuy-a ilang anak. Patabang-tabangon sa karenderya bisag way suweldo. Basta malibre lang sa kaun ug pagtuon. Nisugot si Dencio kay gagmay pa man ilang mga anak nga si Martin ug Maricor. Naa pa sa kinder ug nursery. Ulahi man siyang naminyo. Sayo mang naminyo iyang duha ka igsoon. Unya panagat ug panguma ray gisaligan sa ilang probinsiya sa Mandag-um.

Inig silang sa adlaw, mangundang na si Gaspar ug Bebot sa ilang pagdula og basketbol. Kay moabot na man ang mga kinompra sa mga katabang ni Tiya Nena nila.

Nahuman na lang usa ka game nila sa basketbol, sige gihapog dagandagan ang tawo. Wa maluya. Nirebansin si Gaspar ug Bebot og ikaduha nga game.

"Sulayan kuno nato’g di ba na maluyang tawhana. Tuloon nato ka-game atong basketbol," ni Gaspar.

"Sugot kaayo" ni Bebot.

Pagkabanagbanag, nanglingkod sila sa bangko sa tindahan ni Noy Duar. Nangabli na man siya. Unya nagkadulosingot ug naluya na ang manag-agaw. Apan ang tawo, sige gihapong dagandagan. Ug karon nagtaboktabok na sab siya sa duha ka goal. Naghukas sila sa ilang kamisin nga natumog. Ang ilang hinukas mao ray gitrapo sa ilang lawas.

"Noy Duar, kinsa man nang tawong nagbasketbol nga mao rang usa? Unya sayo pa gyud kaayo?" ni Gaspar.

Wa siya kapugong sa kakuryoso. Nangutana gyud.

"Bitaw, Noy Duar. Kinsa man tuod na?" timang ni Bebot.

Naisa ang kilay ni Noy Duar ug nangunot ang agtang. Nitan-aw sa basketbolan. Apan wa na siya’y nakita.

"Kinsa bay inyong gipasabot? Wa may tawo diha!" ni Noy Duar. Nanigang mga mata sa manag-agaw sa kahingangha. Nahanaw tuod ang basketbolistang nag-inusara. Wa sila kamatikod nga may niagi sa ilang duol. Gilibot mag koral nga semento ang basketbolan. Wa may laing agianan. Habig ra man sa kasadpan nga wa korala.

"May tawo dihang magbasketbol nga mao rang usa. Makaadlawon. Apan tulo ka bulan nang namatay. Giatake sa kasingkasing diha mismo sa tungod sa goal," ni Noy Duar.

Nanglimbawot ang mga balhibo sa manag-agaw. Nangluspad ug gipaningot pag-usab.

"Kinsa man to Noy?" nagdungan ang duhag pangutana.

"Si Atty. Greg Conde. May dayabitis kuno to siya. Unya nagpasingot aron pag-ayuda sa tambal niyang gimintin. Apan nikomplikar na man sa iyang kasingkasing ang sakit. Na-weak man kuno iyang kasingkasing. Maong giatake. Kay dili na diay unta siya angay magbasketbol," ni Noy Duar.

Nahadlok ang duruha nga mopauli sa balay sa ilang uyoan. Distansiya pa mag usa ka gatos ka metros gikan sa basketbolan.

"Maghulat na lang tag apason. Aron may kauban ta," ni Gaspar nga mora na sag kalag ang hitsura sa kahadlok. Niyango si Bebot nga nangluspad sab. (Kataposan)