Kilometro 35

Gula 20

Dihadiha nakatugkad ko sa kamatuoran. Pundok diay sa mga vigilantes ang nakabangal ug nakaluwas nako. Gipaanod diay ko sa suba sa grupo ni Sheldon human sa ilang pag-among-among sa akong pagka babaye. Maayo gani kay naluwas ko sa grupo sa mga vigilantes.

“Duna koy gustong pakisayran gikan nimo, Miss...” wala malahos ni Fernan ang gusto niyang isulti kay wala man siya masayod sa akong ngalan.

“Sandra,” mihagad ko’g tug-an sa akong ngalan. “Ako si Sandra Moral.”

“Duna koy gustong masayran gikan nimo, Sandra.”

“Unsa kana, Fernan?”

“Unsa man diay nahitabo nimo? Nganong nag-utaw-utaw ka man sa suba nga napalgan sa akong mga sakop?”

Wala ko motingog. Mipitokpitok ang akong mga mata nga mitutok sa kisame. Unya wala ko kapugngi ang pag-agas sa akong mga luha samtang naghunahuna sa masakit kong kasinatian sa mga kamot ni Sheldon ug sa iyang mga barkada nga mibanosbanos paglugos nako.

Si Fernan ingon sa nahibulong sa akong paghilak. Pero iya lang ko nga gipasagdan nga mibakho. Morag nakasabot siya sa kasakit nga akong gibati. Igo lang siyang mitutok nako.

“I’m sorry, Sandra,” nagkanayon si Fernan pagkilab sa pipila ka daklit. “D-dili ko tuyo ang pagpasakit kanimo apan...”

“Okey lang,” nako pa nga mihingoshingos samtang namahid sa akong mga luha pinaagi sa akong palad. “Tubagon ko ang imong pangutana.”

Misamot pagtutok si Fernan kanako.

“Biktima ko sa gang rape,” laktod kong tug-an. “Gitabangan ko’g among-among sa mga lalaking hangol sa unod.” -- Sumpayan pa