Because of you, Lord

Dili matukib ang gibati kong kalipay ning buntaga dihang nabasa namo ni Rene sa nasyonal nga pamantalaan ang resulta sa board exam sa tanang mikuha aron mahimong propesyonal ug lisensiyadong enhenyero. Nakapasar si Rene! Hilabihang lipaya sa bugtong kong anak nga migakos nako.

"Ma! License mechanical engineer na gyud ko...!"

Gihapuhap ko ang abaga ni Rene.

"Gidungog gyud ang tanan kong pag-ampo, Rene! Pasalamat tas Ginoo, anak...!"

"Oo, Mama! Thanks God! Ang akong pagka-lisensiyadong mechanical engineer sa pagkakaron, Ma, ipahinungod ko usab kanimo. Because of you, Ma, sa tanan mong pag-antos nga mapa-eskuyla ko nimo sa kolehiyo. Ug ania, nakab-ot na gyud nako ang akong mga damgo!" ug nagpahiyom si Rene nga mitutok nako. "Hinuon, bisan wa pa ko makapasar sa board exam, gipatagamtam ko naman og sugod kanimo, Ma, nga magpuyo ka sa kaharuhay! Miuswag ug milambo man usab ang bag-ong natukod nga machine shop! It's time nga morelaksrelaks ka na lang, Ma!"

Nagyangoyango ko nga gipanglugmawan ang mga mata sa luha. Tungod sa lig-on kong determinasyon nga mahatagan og masanag nga ugma si Rene, hilabihan ko nga nakakamas sa pagtrabaho. Human ko ikahimugso si Rene, nga maoy bunga sa akong pagkadisgrasyada nga nabiktima sa pasalig sa usa ka lalaking minyo, bisan unsa na lang ang matang sa trabaho nga akong gisudlan aron lang mabuhi si Rene ug aron sab makapasar sa binulang abangan sa eskuwater nga akong gipuy-an sa siyudad. Nanawat kog labada. Tinda-tinda og sitsiriyas. Apan dihang naghayskol na si Rene, gipahimudsan ko ang pagkabigot sa akong lawas ug ang nahuptan kong kaguwapa. Misulod kog GRO sa usa ka klab. Aron gyud makakuwarta, nahinayak kog dawat sa mga tanyag sa lalaki, bugti sa kalipay diha sa pagtugyan ko sa akong lawas kanila, ibabaw sa kama.

Nagtigom ko sa akong kinitaan ug maoy gigasto ko sa pagtungha na ni Rene sa kolehiyo. Hilom kong gitago ug gilimod kang Rene ang matang sa panginabuhian nga gisuportar ko sa iyang pag-eskuyla sa kolehiyo. Inubanan sa tumang pailob ug pag-antos, nakagradwar gyud si Rene sa iyang kurso.

Ug nakahukom sab dayon ko nga hingpit na nga biyaan ang akong daotang bisyo sa pagbaligya sa akong lawas ug unod. Nagbag-o nako sa akong kinabuhi, ilabi na nga nakapalit na si Rene og bag-ong balay nga among gipuy-an ug nakapatukod na usab siya og dakong machine shop sa mga sakyanan dinhi sa siyudad.

Dugay na nga nahilakaw si Rene aron susihon ang iyang mga tawo nga nagtrabaho sa iyang machine shop ug busa ania sab ko karon sa sulod sa simbahan sa Cathedral. Nagluhod ko atubangan sa imahen ni Ginoong Hesus.

"Ginoo, salamat Kanimo! Tungod kanimo, napalampos gyud nako ang akong anak sa iyang kurso! Tungod Kanimo, natagamtaman ko na ang kaharuhay sa pagpuyo uban sa enhenyero kong anak. Because of you, Lord ... because of Rene...! O, salamat sa ganting imong gihatag kanako, bugti sa way hunong kong paningkamot!" mikibot ang akong baba nga padayong naglitok og pulong sa pag-ampo ngadto sa Ginoo. (Kataposan)