Sukli sa utang

Gula 179

Tulin nga milabay ang dul-an sa tulo ka tuig sa panagtipon namo ni Ferdinand sa salag sa kaminyoon. Wala gyud mi makabaton og anak. Makapila na unta kadto ako nagmabdos apan ang maong mga bata pulos akong gihikawan pagsud-ong sa kahayag sa kalibotan.

Morag wala na koy kahadlok sa Dios kay sayon ra man kaayo alang nako ang pag-abort sa akong gisabak. Kun tukion pag-ayo, dako na kaayo ko’g sala nga nahimo ngadto kang Ferdinand kay ang bunga sa gitukawan niyang kagabhion gipangunayan man nako paglaglag sa dakong kasayon.

Kun nasayod pa lang si Ferdinand sa akong gibuhat sa mga bata nga akong gisabak, ambot kun unsay iyang buhaton nako. Nasayod kong selfish ra ko kaayo. Nahibalo ko nga usa ako ka dakong makasasala. Pero bahala na. Wala man sab ko mangandoy nga mahimong santa!

Si Ferdinand sab ingon sa nawad-an nag paglaom. Wala na siya mohisgot nako bahin sa iyang pangandoy nga makabaton mig anak. Tingali, nadawat na niya ang kamatuoran nga dili mi makaanak. Gusto unta kadto siyang mahiling gyud mi sa usa ka doktor aron masayran ang lintunganay’ng hinungdan nga wala mi makaanak.

Pero nagdumili ko. Gihimo ko lang alibi nga dili ko makadawat sa kamatuoran kun ugaling madiskobrehan nga ako ang may depekto sa reproductive system. Misalir ang akong drama kay wala na man mamugos si Ferdinand nga magpahiling mi og mananambal. Hangtod nga wala na gyud siya makighisgot nako bahin og bata nga kaugalingon namong anak.

“Managop na lang kaha ta,” nagkanayon si Ferdinand usa ka higayon niana samtang nangaon mi sa panihapon.

“Ngano man?” Gipangutana ko siya. “Nawad-an ka na bag paglaom nga makaanak ta?”

“Wa pa man hinuon. Pero morag gilaay na kong nagpaabot.”

“Di lang una ta managop sa pagkakaron. May paglaom pa, uy. Batan-on pa god ko.”

Nakombinser si Ferdinand sa akong gisulti kaniya.

Sa gihapon, wala magkulang si Ferdinand sa iyang kaakohan ngari nako isip iyang asawa. Gitubag niya kanunay ang akong biological needs. Buhong ko sa sex kay agresibo man sab kaayo siya.

Milabay ang lain pang usa ka tuig. Walay kausaban ang daily routine sa akong kinabuhi. Inigbiya ni Ferdinand sa condo aron motrabaho, bation dayon nako ang makabuang nga kalaay. -- Sumpayan pa