Sukli sa utang

Gula 175

Mogawas na unta ko sa lawak sa dihang naabli kini. Nahinangop ko dihang maoy akong nakita si Ferdinand nga misulod.

“Diin ka man?” Gipangutana ko siya, kalit lang mihuwas ang gibati kong kabalisa ug kahingawa.

“Didto ko sa ibabaw nga bahin ning hotel,” maoy iyang tubag. “Sa may 10th floor.”

“Nag-unsa ka man didto?”

“Gisud-ong ko lang ang katahom sa kabuntagon. Nalingaw ko sa akong pag-aninaw sa palibot. Nindot man diay kaayo ang Baguio, Editha.”

“Gipakaingon ko’g imo na kong gibiyaan.”

“Dili kana mahitabo. Pagmata nako kaganina, nahinanok ka pa man. Wa ka na lang nako pukawa kay mobalik ra man sab dayon ko.”

Gikawhat ni Ferdinand ang telepono ug midayal sa numero sa room service. Nag-order siya sa among pamahaw.

“Manuroy na ta unya human sa pamahaw,” nagkanayon si Ferdinand samtang nagpaabot mi sa gi-order niyang mga pagkaon.

“Ikaw ang mag-igo,” mao ray akong tubag agi’g pag-uyon.

Wala madugay nahiabot ang among gi-order. Gipasulod ni Ferdinand ang naghatod niini aron ikapahimutang ang mga pagkaon sa ibabaw sa lamesa sulod sa anteroom sa among lawak. Nag-order sab diay si Ferdinand of aperitif. Kini ang giuna niya’g inom sa wala pa mi magsugod og pangaon.

Namahaw una mi. Pagkahuman, miuna si Ferdinand og kaligo sa banyo. Paggawas niya, ako na sab ang mibanos pagsulod sa banyo ug naligo. Sa akong paggawas, nakailis na si Ferdinand, ready na sa among pagpanuroy.

Kadali ra sab kong nakahuman og ilis. Nanggawas dayon mi sa among lawak sa hotel. Sa reception desk gibilin namo ang yawe sa among akomodasyon kay mao man kini patakaran sa hotel nga among gitsek-inan.

Nanuroy dayon mi. Maoy among giuna ang Burnham Park. Nalingaw ko sa among pagsakay-sakay sa bangka. Alegre kaayo ang Burnham Park. Daghan kaayong tawo sa Baguio niadtong tungora ilabi na nga nagsingabot ang nabantog na kaayong Penagbenga Festival sa maong siyudad.

Gikan sa Burnham Park, miadto mi sa Mines View Park. Mihulog si Ferdinand og sensilyo sa wish well. Unya mipatighulog mi ngadto sa Botannical Garden ug sa ubang suroyanan nga wala pa namo maadto.

Pagpauli namo sa hotel nga among giistaran, lapoy ang among lawas. Pero nagkugi gihapon si Ferdinand pagkatkat sa kapayas. -- Sumpayan pa