Sukli sa utang

Wala na ko motubay sa ulahing gisulti ni Ferdinand. Ang akong gihunahuna mao ang pagpangitag alibi aron dili mahinayon ang iyang plano nga magpahiling mi og doktor aron masayran kun kinsa namo ang may depekto ug dili makahatag og anak.

Para nako, wala na kinahanglana nga magpahiling pa kami og doktor. Nag-usik-usik lang kini sa panahon. Nakaseguro na man god ko nga tambok ang akong reproductive system kay nagsabak na man ko pero ako lang kini nga gipakuha. Si Ferdinand segurado sab nga walay depekto kay nakaburos man siya nako. Wala lang siya masayod nga gi-abort ko ang bata.

"Inig-day off nako," ni Ferdinand pa. "Magpahiling ta og doktor. Si Dr. Lei Vallecera ang atong duolon. Mangayo lang ta'g rekomendasyon kang Mr. Dee kay managhigala man sila."

"Dili lang una tingali ta magpahiling og doktor, uy," giingnan ko siya.

"Nga-ngano man?"

"Unya na kana nato buhaton kun wa na gyo'y laing paagi."

"Unsay buot mong ipasabot?"

"Sa pagkakaron, suwayan una nato ang ubang mga paagi aron makabaton ta'g anak. Tingalig tungod sa sobra mong pagtrabaho maong dili gyod ta makabuo bisan pag unsaon nimo'g sansan?"

"Unsa may gusto mo nga atong buhaton?"

"Hain may maayo kun mamakasyon una ta ngadto sa usa ka dapit nga makarelaks ta."

"Sa Boracy ba?"

"Puyde sab. Pero mas gusto nako nga sa Baguio."

"Morag maayo nang imong ideya, da."

Nagkasabot mi. Busa, niana dayong pagkaugma, nananghid dayon siya sa iyang amo nga mamakasyon mi. Gipasabot niya'g maayo ang iyang agalon nganong gusto ming moadto sa Baguio. Nakasabot si Mr. Dee sa among katuyoan maong misugot kini. Giaprobahan dayon ang gi-file nga vacation leave ni Ferdinand. Ug nangandam dayon mi sa among pag-adto sa Baguio.

Pagkasunod adlaw, nanglarga dayon mi ngadto sa Baguio. Nag-bus lang mi paingon didto. Sa among pag-abot, midiretso mi'g check in sa usa ka hotel nga dili kaayo layo sa kinapusoran sa siyudad.

Sa unang gabii namo ni Ferdinand sa Baguio, kugihan kaayo si Ferdinand nga mikatkat sa kapayas. (Sumpayan pa)