Kilometro 35

Gula 9

Midagan ko ug midagan tadlas sa bagang kakahoyan ug kasagbotan nga nagngiob tungod sa kangitngit nga mihugpa sa maong dapit.

May mga higayon sa akong pagdagan nga mahitakilpo ko kun makasindol o makatunob og bato. Usahay masapid ko kun makadasmag og bagon-bagon ang akong mga tiil ug matumba ko. Apan sa tinguha nga dili maapsan sa mga lalaki nga naggukod nako, manglimbasog kong makatindog gilayon ug mopadayon sa pagdagan nga walay tumong.

Bahala nag asa ko moabot sa akong pagdinagan. Ang importante alang nako nga makalikay ko ni Sheldon ug sa iyang mga barkada. Natugkad nako nga dili gayod sila magduhaduha sa paghimog daotan kanako. Gipatay man gani nila si Orville sa walay kukaluoy!

Mipadayon ko pagdagan. Sa akong banabana, layo na ang akong naabtan. Pero wala koy ideya kun asa nga direksiyon ang akong gipadulngan kay ingon sa makalipong ang kangitngit sa taliwala sa lasang.

Mihunong ko’g dagan dihang nag-abot na ang akong gininhawa sa kakutas. Gikapoy na ko sa pagdinagan maong mipahulay una ko’g kadiyot. Milingi ko sa akong gigikanan. Wala ko na makita ang dan-ag sa mga flashlight nila ni Sheldon nga nangita ug migukod kanako.

Nagpasalamat ko sa hilom. Nalipat seguro sila maong wala na sila makasunod nako. Maayo untag dili na gyud ko nila masundan hangtod nga makagawas ko sa lasang. Basin makakaplag ko’g balay sa unahan ug makapangayog panabang. Dili gyud ko magpadakop nila ni Sheldon.

Dihang nakapahulay na ko’g diyotay, nakahukom kong mopadayon na ngadto sa unahan aron makapalayo na sa hingpit gikan nila ni Sheldon. Apan dihang mosugod na unta ko’g lakaw, kalit lang misiga ang mga flashlight sa akong duol. Gilibotan na diay ko nila ni Sheldon! -- Sumpayan pa