Sukli sa utang

Gula 170

Nahinayon gayod ang kasal namo ni Ferdinand sa Simbahan segun sa gikatakda. Daghan kaayong nanambong sa among kasal, mga kauban ni Ferdinand sa trabaho ug uban pang mga dinapit.

Ang reception didto gipahigayon sa Coconut Palace sa may Roxas Boulevard. Alegre kaayo ang pagpangaon. Human sa pangaon, gipadayon ang panaghudyaka pinaagi sa usa ka tulomanon diin kami si Ferdinand ang main attraction. Pero para nako, morag dili na kaayo exciting ang kasal namo sa Simbahan. Mas nalingaw ko niadtong pagpakasal namo sa civil.

Kun dili pa lang lagi tungod sa kaikog nako ngadto sa amo ni Ferdinand nga si Mr. Dee, dili na unta ko mosugot nga magpakasal na kami sa pari. Igo na para nako ang kasal nga civil. Para nako, binding man ang kasal nga civil. Miuyon lang ko nga magpakasal mi sa pari aron dili malain si Mr. Dee nako.

Nahuman gyud ang kasal. Paglabay sa duha ka adlaw, nangandam na ang mga igsuon ug inahan ni Ferdinand. Mamauli na sila ngadto sa Bohol.

“Panggaa baya ang akong anak,” tugon ni Nanay Isabel sa dihang nagkahigayon siya sa pagpakigsulti nako human sa pamahaw. “Abi mo, dili pa baya unta nako paminyoon si Ferdinand bisan naglukdo na siya’g pangedaron kay mao kana siya’y nagbuhi namo.”

Wala ko makatingog. Nakalitan ko sa gisulti sa akong ugangan nga babaye. Inanay nakong nasabtan nga morag wala siya’y gusto nga nangasawa si Ferdinand nako. Gilainan ko sa iyang sinultihan.

“Ayaw kabalaka, Nay,” giingnan nako ang akong ugangan pagkataudtaod. “Makatilaw gihapon mo sa hinagoan ni Ferdinand bisan minyo na siya. Di man ko magdili niya sa paghatag ninyo. Sa akong pagpakigminyo niya, wa nako siya kuhai sa iyang katungdanan nganha ninyo, labina nimo nga maoy iyang inahan.”

Nakita ko nga nanglipaghong og diyotay ang nawong ni Nanay Isabel nga morag nahangan og diyotay sa akong gisulti.

Nianang pagkaudto, nahiabot si Ferdinand sa condo nga nagdala na sa sakyanan ni Mr. Dee nga iyang giuslan. Mao kini among sakyan sa paghatod sa iyang inahan ug mga igsoon ngadto sa pier. Dili unta ko mokuyog sa paghatod nila ngadto sa pier pero mirespetar lang ko tungod ni Ferdinand. Wala ko magpasabot ngadto niya nga nalain ko sa iyang inahan. -- Sumpayan pa