Sukli sa utang

Gula 169

Gitakda gilayon ang kasal namo ni Ferdinand sa Simbahan human niya nahikay ang tanang rekisitos. Kadali rang nahikay ang tanang gikinahanglan kay gitabangan man siya sa iyang amo nga si Mr. Dee.

Gibayran ni Mr. Dee ang tanan nga angay bayran basta madali lang ang among kasal. Nag-enistrikto gani unta kadto ang usa sa mga tig-alagad sa Simbahan nga maoy modumala sa seminar sa mga kaslonon. Pero milugdat ang mga mata sa maong tig-alagad dihang gipakitaan ni Mr. Dee sa iyang pitaka nga busog kaayo sa daghang kuwarta.

Kadali rang naka-issue og resibo ang cashier/treasurer sa Simbahan. Ug gi-schedule gilayon ang among kasal.

Tulo ka adlaw sa dili pa ang kasal, nahiabot ang inahan ni Ferdinand gikan sa ilang probinsiya sa Bohol. Kuyog niya ang duha ka manghod ni Ferdinand nga sila si Toni ug Grace. Biyuda na si Nanay Isabel, ang inahan ni Ferdinand, sa edad nga 59.

Akong nasayran nga sayong mipanaw ngadto sa laing kalibotan ang amahan nila ni Ferdinand nga usa ka musikero. Tungod kay sayong nailo sa amahan, si Ferdinand napugos sa pagpanarbaho sa edad nga katorse. Siya’y nahimong breadwinner sa ilang pamilya.

“Maayo kay nianhi gyud mo sa Manila, Nay,” giingnan nako ang inahan ni Ferdinand kun sa Binisaya pa sanglit gitinagalog ko man ang pagpakigsulti kaniya, “aron pagtambong sa kasal namo ni Ferdinand.”

“Gitelegramahan ko ni Ferdinand,” maoy iyang tubag. “Nagsunod sab sa telegrama ang pamilite namo. Tungod sa kakalit sa iyang pahibalo, di unta mi makaanhi kun wala pa mi padad-i og plite.”

Si Ferdinand nay mipasabot kang Nanay Isabel nganong dili makatambong ang akong mga ginikanan sa among kasal. Gipatuo ni Ferdinand ang iyang inahan sa unsay iyang nadungog gikan nako.

“Dili pa siya andam makig-atubang sa iyang mga ginikanan, Nay,” matud ni Ferdinand ngadto sa iyang inahan, “gumikan sa iyang kahiubos nga gusto siyang ibuya nila ngadto sa usa ka lalaki nga wala niya higugmaa.”

Apan ang tinuod nga hinungdan nganong dili ko gustong motambong ang akong mga ginikanan sa kasal namo ni Ferdinand mao nga dili ko gustong mabuking nga aduna koy tinagoan sa kinabuhi ug pulos bakak ang akong gipatuo ngadto kang Ferdinand bahin sa mga panghitabo sa akong kinabuhi. -- Sumpayan pa