Kilometro 35

Gula 7

Samtang nagdagan ang sakyanan nga gimaneho ni Sheldon, gibati ko ang tumang kahingawa sa nahitabo kang Orville. Daghan kaayo siya’g mga samad nga among gibiyaan didto sa Kilometro 35. Naigo siya sa lainlaing bahin sa iyang lawas sa pagpusil ni Sheldon kaniya.

Sa akong pangagpas, morag dili na maluwas si Orville sa iyang gidangatan. Labina gyud kun wala’y makatabang kaniya. Niini, mibati ko’g kaluoy sa akong hinigugma. Kaluoy nga milubad ngadto sa kaguol.

“Ihunong kining sakyanan, Sheldon,” giingnan ko ang lalaking maoy nagpusil sa akong boyfriend. “Mokanaog ko. Tabangon nako si Orville.”

“Ayaw na lang pag-usik og panahon, Sandra,” nagkanayon si Sheldon. “Dili na maluwas si Orville sa iyang kahimtang busa pasagdi siyang mamatay didto sa Kilometro 35.”

“Mananap kang dako,” nako pa nga mipahungaw sa akong kasuko kang Sheldon. “Wa kay kaluoy! Gipusil mo ang tawong way dag-anan!”

“Mibulig lang kanako ang kahigayonan, Sandra,” nangatarongan si Sheldon. Nagpasabot lang kini nga kanamong duha ni Orville, ako gyud ang angay nga magmadaogon.”

Wala na ko motubay sa iyang gisulti. Nasayod ko nga bisan unsa pa ka sakto ang akong mga katarongan, wala gihapon koy dag-anan kay nahulog na man ko sa mga kamot ni Sheldon ug sa iyang mga barkada. Kini karon ang lain kong gikabalak-an. Walay makaluwas nako kun may daotang buhaton sila si Sheldon kanako karon.

Nagpadayon pagdagan ang luhong sakyanan nga gipangunayan pagmaneho ni Sheldon. Paglabay sa pipila ka gutlo, mitipas ang sakyanan gikan sa highway ug mao nay gisubay ang gansalgansalong karsada.

Pagkataudtaod, mihunong ang among gisakyan sa atubangan sa usa ka abandonadong bodega. -- Sumpayan Pa