Upat na lang ka tikod sa akong sapatos, nga nangahilis sa adlaw-adlaw kong pagpamisita ni Noring, apan wa gayo’y igong kahayag sa akong kalauman, nga sugton ako sa maong babaye, nga gipakamutya sa tim-os kong gugma ning among balangay sa Pitalo.
"Unsa man gayo’y igong hinungdan Noring, nga sa kadugay ko nang naghalad kanimo ... wa ma gayod ikaw makat-on nga imo akong higugmaon?" kausa nangurso na lang gayod ako og pangutana ni Noring.
"Sa imong kalaksot og hitsura nga mas guwapo pa ang unggoy sa lasang!" pintok ug way lipod-lipod nga gidaygan ako ni Noring.
"Karon god nga panahona... Masyong, ang pilion sa babaye mao ang iyang pagka-pogi ug labaw sa tanan may jewel!"
Ingon ako sa nasud-ipan sa gipamulong ni Noring, ug way pupananghid gitikang ko lang og deritso ang kataas sa ilang hagdan aron ako manaug.
"Mirisi ka Masyong, nga gituyoan mo man gayod sa pagpanguyab ang maong babaye nga sobra kahimilian og guwapo ug labaw sa tanan ... sapian!" gisermonan ako ni Nanay Eser, nga taudtaod na usab nabiyuda kang anhing Tatay Goyong, nga gisagolan og mapait nga sudya kanako.
Miabot ang panahon nga wa ko palandonga. Gigahin ko na lang ang tanan kong oras sa akong giuma nga kamaisan nga kabilin pa ni anhing Tatay Goyong nga gibaol.
"Ssstttttttttt!" kalit lang nagagtos ang pinanawan sa akong paghanduraw samtang ako nagsurko sa pagdaro.
"Mao na lamang akong nasigpatan si Noring nga nagbusyad na lang ang tiyan kay mabdos ug umaanak.
"Syong ... karon pa ko makaamgo sa kaulahian nga ang imo diay'ng hitsura mas labaw sa kaguwapo ni Bartolo!" nagbakho nga namulong kanako si Noring.
"Kun mahimo, ikaw na lang ang motubos sa kaakohan ni Bartolo, nga maoy nakasapli sa akong gihay!"
Sa sinugdan wa ko tubaga ang gisulti kanako ni Noring, kay nagpasulabi man gihapon kanako ang kasilag nga iya akong giayran.
"Unsa may gipasabot mo kanako Noring?" diha pa mogawas ang akong tingog.
"Pakasli ako Masyong, aron matibway ang tanan ug dili ako tamayon sa atong mga silingan nga gipaangkan!" misamot og dangoyngoy sa paghilak si Noring.
"Naluoy baya ako sa imong gidangatan ... pero bililhon ang gugma kun ang imong gihigugma ... mahigugma!" prangka ko nga gidaygan ang maong babaye. (Kataposan)