Sukli sa utang

Kalit lang giyatakan sa driver ang brake sa taxi nga among gisakyan dihang ang bus nga nag-una namo nga nagsubay sa laing lane kalit lang mitabok sa among lane ug giserad-an ang among agianan. Misagitsit ang ligid sa taxi nga among gisakyan gumikan sa kakalit sa pagpreno sa driver. Nakasiyagit ko kay kuwang na lang gyod og gamay kon dili magkasaghiray ang bus ug ang taxi nga among gisakyan.

"Putang 'na!" Nakapamalikas ang driver sa taxi nga among gisakyan. "Pahamak!"

Nakaabot gyod mi sa Alabang nga luwas sa disgrasya.

Miabot ang adlaw'ng Lunes. Andam na ang tanang gikinahanglan sa pagpakasal namo ni Ferdinand. Ang among mga ninong ug ninang mao ra sab ang mga sakop sa pamilyang Dee. Ang agalon ni Ferdinand nga si Mr. Dee maoy nagbuot nga usa ka luhong kan-anan sa Manila Hotel ipahigayon ang reception. Siya man ang miabaga sa tanang galastohan.

Alas onse sa sayong kaudtohon nahinayon gayod ang kasal namo ni Ferdinand nga gipahigayon didto mismo sulod sa buhatan sa solemnizing officer nga si Rev. Amelia Mangubat. Human sa hamubong seremonyas, mipadayugdog mi ngadto sa Manila Hotel alang sa reception. Wala na mokuyog si Rev. Mangubat namo kay may importante kuno siyang asikasohon.

Gibati ko ang tumang kalipay. Halandomon kaayo ang maong adlaw alang nako. Wala man god ko magdahom nga human sa daghang dili maayong kasaysayan sa akong pagpakiglambigit sa lainlaing mga lalaki, aduna pa diay usa ka lalaki nga makabaton og interes sa pagpakasal nako. Niini, nakaingon ko sa akong kaugalingon nga suwerte kaayo ko nga nakahibalag og lalaki nga sama kang Ferdinand.

Apan wala pa gihapon siya masayod sa tanan kong mga tinagoan. Nakahukom kong ipadayon na lang ang paglilong ko kaniya sa akong mga sekreto. Sa akong tan-aw, dili na kinahanglang masayod siya sa tanang kasaysayan sa akong pagka babaye ug sa akong kinabuhi.

Nianang pagkagabii human sa among kasal, mainiton ang panagtagay namo ni Ferdinand sa lawasnong kalipay. Gisubli namo sa makadaghan ang pagkatkat sa kinatumyan sa ikapitong langit hangtod nga amo nang naangkon ang hingpit nga katagbawan.

"Gusto kong makabaton dayon tag liwat," ni Ferdinand pa human sa makutas namong lovemaking session.

Wala ko motingog. Sa hilom wala ko makauyon sa iyang gisulti. (Sumpayan pa)