Kilometro 35

Nakasiyagit ko sa kalisang dungan ang pagpanap-ong sa akong dalunggan sa akong mga kamot dihang mibuto ang armas nga gigunitan ni Sheldon. Abi kog gipusil na niya si Orville. Igo lang diay siyang mipasalba.

Ang mga barkada ni Sheldon nahiugnok ug nakugang paglanog sa masipang buto. Napahunong sila sa pagkulata kang Orville. Nahitan-aw sila kang Sheldon nga naggunit og armas nga mobuto.

"Padaplin mo," gimandoan ni Sheldon ang iyang mga barkada.

Dihadiha gibuhian si Orville nila ni Ervin, Karl ug Lyle. Mihagba si Orville sa semento nga daw luya na kaayo tungod sa mga bun-og nga iyang nadawat. Mipalayo kaniya ang unom ka barkada ni Sheldon.

Niining tungora, mihinay na'g bangon si Orville. Pero tungod ba kaha sa iyang kaluya, nahasarasay siya. Maayo gani kay nakagunit siya sa kilometrohan nga semento sa Kilometro 35 ug wala siya malahos og katumba.

Gusto kong moduol sa nahimutangan ni Orville apan abtik nga migunit nako si Ervin.

"Buhii ko!" gisinghagan ko si Ervin uban ang paglugnot.

"Ayaw na lang paglangas," ni Ervin nga misamot ang kahugot sa paggunit niya nako.

Misamot ang kakulba sa akong dughan dihang giisa ni Sheldon ang iyang kamot nga naggunit sa pistola ug kini girumbo ngadto kang Orville.

"Sheldon, u-unsay imong buhaton?" nagkurog ang akong tingog.

"Kinahanglang matibway ang tanan, Sandra," ni Sheldon pa. "Aron wa nay makababag sa akong pag-angkon kanimo!"

Dihadiha gikablit ni Sheldon ang gatilyo sa iyang pistola. Nakasiyagit ko sa kalisang dihang naigo si Orville sa iyang pagpusil. Nahagba ang akong boyfriend sa tiilan sa kilometrohang semento sa Kilomero 35. Naglunang si Orville sa kaugalingon niyang dugo! (Sumpayan pa)