Gula 2
Nahibulong ko nganong gipahunong ni Orville ang motorsiklo nga among gisakyan tungod sa Kilometro 35. Ngitngit ug awaaw ang maong dapit.
“Nga-nganong nanghunong man ta dinhi?” gipangutana ko si Orville.
“Flat tire,” maoy iyang tubag. “Mihiyos ang usa ka ligid sa motorsiklo nga atong gisakyan. Demalas kaayo.”
“Unya? Unsa man ang atong buhaton niini karon?”
“Maghulat na lang ta nga may sakyanan nga moagi, Sandra. Mamasin ta nga may bus pang nibiyahe niining orasa paingon sa siyudad.”
“Unya, kining motorsiklo?”
“Biyaan ta lang kini dinhi. Ipadaplin ko lang kini ug tabonan sa mga sagbot. Balikon ko na lang ni ugma.”
Wala na ko motubay sa ulahing gisulti ni Orville. Nagpaningod ko sa palibot. Mingaw gyud kaayo ang dapit nga gihunongan namo ni Orville. Ug makapalimbawot sa balhibo ang kabugnaw sa hangin nga misapigad sa akong panit. Tigmi kaayo ang katugnaw sa huyuhoy.
Wala dangtig dugay, nadungog namo ang andar sa sakyanan nga nagkaduol sa among nahimutangan. Tayming kay gipadaplin na sa paghipos ni Orville ang among motorsiklo. Gipara dayon namo ang nagsingabot nga sakyanan. Gisalipdan ko’g diyotay sa akong kamot ang akong nawong kay suwaw kaayo ang headlight niini nga miigo kanamo ni Orville.
Mihunong ang sakyanan sa among tungod. Pero nasagmuyo ko dihang akong nailhan ang mga tawong nagsakay niini. Sila diay si Sheldon. Ang sakyanan diay ni Sheldon maoy among napara.
“Hey,” ni Sheldon nga miunag kanaog sa ilang gisakyan ug miduol namo ni Orville sinundan sa iyang mga barkada. “Need some help?”
Wala ko motubag sa pangutana. Mitan-aw ko kang Orville nga ingon sa wala mahimuot sa presensiya nila ni Sheldon. -- Sumpayan pa