Sukli sa utang

Gula 162

Wala ko magdahom nga mo-propose si Ferdinand nako og kasal niadtong higayona. Sa hilom nalipay ko sa iyang tanyag. Apan wala lang nako ipa-display ang akong kalipay sa pagtuo nga dili angay nga mopakita ko’g dakong kahinangop sa iyang atubangan.

“Imo kong pakaslan?” Gisukna ko siya aron pagseguro kun wala ba ko masayop sa akong nadungog.

Usahay ra ba limbongan ta sa atong nadungog.

“Oo,” tubag ni Ferdinand. “Dili ka matuo?”

“Mituo man. Wa lang ko magdahom nga imo kong pakaslan dayon.”

Nahinumdom man god ko sa gibuhat ni Davon nako. Iya kong gihagad nga mag-live in mi. Unya na kuno mi magpakasal kun andam na siya. Wala gyu’y klaro kun kanus-a ko niya pakasli. Morag iya lang kong gisaad-saaran aron molahutay ko sa pagpakig-live in niya. Gipalaom.

Lahi gyud si Ferdinand kang Davon.

“Mosugot ka ba, Editha?” Naputol ang akong pagpamalandong dihang gipangutana ko ni Ferdinand. “Unahon nato ang kasal sa civil.”

“H-ha?” Nahakanga ko.

Nakalitan ko pag-ayo sa proposal ni Ferdinand maong wala dayon ko makatubag. Dili pa unta ko andam magminyo. Pero gikapoy na ko sa kinabuhi nga puno sa kagubot ug walay direksiyon. Mao nga namasin kong pinaagi kang Ferdinand, makabaton na’g kalinaw ang akong kinabuhi.

“Nganong wa nimo tubaga ang akong pangutana, Editha?” gikan ni Ferdinand. “Nagpasabot ba kini nga dili ka pa andam magpakasal nako?”

“Dili sa ingon niana, Ferdi,” giingnan ko siya. “Morag dili lang ko makatuo nga imo kong pakaslan. Labina nga...”

“Ayaw nag hisgoti ang kagahapon,” gipakgang ko ni Ferdinand nga ingon sa nakaapas sa buot kong isulti. “Mao nay atong hisgotan ang karon. Okey ba?”

“O-okey,” nako pa. “Kun maoy imong gusto.”

“Ang gusto kong masayran karon gikan nimo kun andam ka na bang magpakasal nako?”

“Andam na ko, Ferdinand. Bisan unsang adlawa. Bisan unsang orasa. Ug bisan unsang dapita.”

Nalipay pag-ayo si Ferdinand sa nakab-ot kong hukom.

Namalik dayon mi sa condo human makapaniudto. Ug sulod sa among lawak, lain na usab nga lovemaking session ang nahitabo. -- Sumpayan pa