Ang Tinagoan

Gula 60

(Kining maong nobela gibase sa matuod nga kaagi ni Dinah).

Gihimo ni Dinah ang tanan aron maapiki si Kobe ug dili na makabalibad sa gusto niyang mahitabo. Tuod man, napugos gayod si Kobe sa pagpakasal kaniya bisan bukid kini sa kabubut-on sa lalaki.

Dili maayo ang kahimtang sa ilang kaminyoon. May gap ang ilang relasyon isip magtiayon. Kanunay silang mag-away. Sa matag higayon nga magkalalis sila, sukmatan dayon si Dinah ni Kobe mahitungod sa pagpikot niini kaniya. Wala malipay si Kobe sa ilang kaminyoon.

Mipailob si Dinah. Nakasabot siya sa side ni Kobe. Nasayod siyang dili lalim kun siya pay nahimutang sa dapit niini. Giangkon ni Dinah sa iyang kaugalingon nga gilingla ug gilit-ag niya si Kobe aron kini mahulog sa iyang mga kamot tungod sa dako niyang gugma niini.

Dihang misugod nag busyad ang tiyan ni Dinah, nakamatikod siya nga inanay’ng nausab ang pagtagad ni Kobe kaniya. Nagpakita na kini’g care and assurance kaniya. Sa laktod, maayo na ang ilang pagtinagdanay.

May gipahigayon nga reunion ang batch 1993-94 graduates sa Santa Angela Academy kanus-a si Padre Gio pay school director sa tulonghaan. Si Dinah gidapit sa higala niyang magtutudlo pagtambong sa maong okasyon. Nagkakita sila si Padre Gio. Nagkasultihanay sila sa makadiyot.

“Minyo ka na diay?” Gikan ni Padre Gio nga mipasiplat sa iyang tiyan.

“Oo,” tubag ni Dinah. “Taga barangay Lampaknay ang akong nabana.”

“Maayo hinuon nga nagminyo ka na.”

“Sorry sa nahitabo sa una, ha.”

“Kalimti na kadto. Isipon ta na lang kadto nga usa ka tinagoan nga angay nang ilubong sa sam-ang sa kagahapon.”

Kaswal na kaayo ang pagtinagdanay nila ni Dinah ug Padre Gio. Mora bag wala sila’y sexual relationship sa nakalabay nga panahon! -- Taposon sunod gula.